თბილისი, 22 სექტემბერი – Sputnik. თურქულმა კომპანია ENKA Renewables-მა საქართველოს მთავრობასთან „ნამახვანჰესის“ კაშხლის მშენებლობის შესახებ კონტრაქტი გაწყვიტა, ნათქვამია ENKA İNSAAT-ის განცხადებაში.
განცხადებაში აღნიშნულია, რომ შეთანხმების გაწყვეტის მიზეზი კონტრაქტის პირობების და გარემოებების დარღვევაა.
„ENKA İNSAAT აცხადებს, რომ მისმა შვილობილმა კომპანია Enka Renewables-მა გადაწყვიტა გაწყვიტოს კონტრაქტი საქართველოს სახელმწიფოსთან ნამახვანის კაშხლის პროექტის შემუშავების, მშენებლობის, ფლობისა და ექსპლუატაციის თაობაზე, რაც უკავშირდება კონტრაქტის ხანგრძლივ დარღვევებს 2019 წლის 25 აპრილიდან და ფორსმაჟორულ სიტუაციებს“, – ნათქვამია განცხადებაში.
პროექტის ღირებულება 800 მლნ დოლარს შეადგენდა.
საზოგადოებრივი პროტესტი „ნამახვანჰესის“ მშენებლობის წინააღმდეგ იმერეთის რეგიონში ათ თვეზე მეტია გრძელდება. ჰესის მოწინააღმდეგეები ამტკიცებენ, პროექტი გამოუსწორებელ ზიანს მიაყენებს რეგიონის ეკოლოგიას. ისინი კომპანია ENKA-სთან კონტრაქტის გაწყვეტას მოითხოვდნენ.
საქართველოს მთავრობამ 2019 წელს „ნამახვანჰესის“ კასკადის მშენებლობის, ფლობისა და ექსპლუატაციის უფლება ნორვეგიულ კომპანია Clean Energy Group-ს გადასცა, რომელმაც, თავის მხრივ, მშენებელ კომპანიად თურქული ENKA მოიწვია. საინჟინრო ნაგებობის აგება ორი მუნიციპალიტეტის – ცაგერისა და წყალტუბოს ტერიტორიაზე იგეგმებოდა.
„ნამახვანჰესის“ პროექტი ორი ჰესის კასკადისგან შედგება: ერთის ფართობი 1 კვ.კმ-ია, მეორის – 5,1 კვ.კმ. კასკადის მეშვეობით დარეგულირდება წყლის დონე, რათა ხეობაში თავიდან იქნეს აცილებული წყალდიდობა.
პროექტი დასრულების შემდეგ საქართველოში ელექტროენერგიის წლიური წარმოების 15%-ით გაზრდას ითვალისწინებდა.
წაიკითხეთ ასევე: