ოჯახში ძალადობის გამო სამი პოლიციელი სამსახურიდან გაათავისუფლეს

© photo: Sputnik / Stringerოჯახური ძალადობა
ოჯახური ძალადობა - Sputnik საქართველო
გამოწერა
მაღალი რისკის მატარებელი მოძალადეების ქცევის გასაკონტროლებლად წლის ბოლომდე ელექტრონული სამაჯურები დაინერგება.

თბილისი, 10 ივლისი — Sputnik. 2018 წელს ოჯახურ დანაშაულზე დისციპლინური სახდელი პოლიციის ათ თანამშრომელს დაეკისრა, მათგან სამი კი სამსახურიდან გათავისუფლდა, ნათქვამია საქართველოს შინაგან საქმეთა სამინისტროს პრეს-სამსახურის მიერ გავრცელებულ განცხადებაში.

ოჯახური ძალადობა - Sputnik საქართველო
ქალებს საქართველოში უმეტესად ოჯახური კონფლიქტების საფუძველზე კლავენ

უწყების ცნობით, 2018 წლის იანვარ-ივნისის პერიოდში ოჯახში ძალადობის შემთხვევები 2017 წლის მთლიან მაჩვენებელს უტოლდება. კერძოდ, გამოძიება დაიწყო ოჯახური დანაშაულის 2 804 ფაქტზე, ხოლო სისხლისსამართლებრივი დევნა — 1 933 პირის მიმართ. ოჯახური დანაშაულის ბრალდებით მიმდინარე წლის ექვს თვეში დაკავებულია 1 328 პირი.

ოჯახურ ძალადობაზე სასჯელი მკაცრდება>>>

რაც შეეხება მსხვერპლთა დაცვის მიზნით გამოცემულ შემაკავებელ ორდერებს, 2018 წლის ექვს თვეში გაცემული შემაკავებელი ორდერების რაოდენობა 3292-ს უტოლდება, რაც ორჯერ აღემატება მთელი 2017 წლის მონაცემებს.

გავრცელებული ინფორმაციით, ოჯახურ დანაშაულზე დისციპლინური სახდელები დაეკისრათ პოლიციელებსაც.

„ოჯახურ დანაშაულზე არასათანადო რეაგირების გამო დისციპლინური სახდელი დაეკისრა პოლიციის 4, ხოლო ოჯახური ძალადობის ჩადენის გამო 6 თანამშრომელს, რომელთაგან 3 დათხოვნილ იქნა შინაგან საქმეთა სამინისტროს რიგებიდან", — აღნიშნულია განცხადებაში.

უწყებაში აცხადებენ, რომ კანონქვემდებარე აქტებში განხორციელებული ცვლილებების მიხედვით, შემაკავებელი და დამცავი ორდერის გამოცემისთანავე პოლიციის თანამშრომელს სამსახურებრივი იარაღი ჩამოერთმევა.

გამოსასწორებელი კოლონია - Sputnik საქართველო
ელექტრონული სამაჯური მოძალადე ქმრებისთვის და პენიტენციალური რეფორმის სხვა სიახლეები

გარდა ამისა, მაღალი რისკის მატარებელი მოძალადეების ქცევის გასაკონტროლებლად წლის ბოლომდე ელექტრონული სამაჯურები დაინერგება.

გაზრდილია დისკრიმინაციული ნიშნით ჩადენილი დანაშაულების რიცხვიც. კერძოდ, 2018 წლის 6 თვეში დაკავებული იქნა 50-ზე მეტი პირი, რაც მთელი 2017 წლის მთლიან მონაცემს აღემატება.

ამჟამად საქართველოს პარლამენტში შსს-ს მიერ ინიცირებული კანონპროექტის პაკეტი იხილება, რომელიც ოჯახური დანაშაულისა და ქალთა მიმართ ძალადობის გამო სასჯელის გამკაცრებას ეხება. საკანონმდებლო ცვლილებების მიხედვით, მკაცრდება ოჯახში ძალადობაზე სასჯელი; გენდერული ნიშნით დანაშაულის ჩადენა  ხდება დამამძიმებელი გარემოება; ცალკეული დანაშაულებისთვის მკაცრდება სასჯელი ოჯახური დანაშაულის განმეორებით ჩადენისათვის; შემაკავებელი და დამცავი ორდერის პირობების დარღვევისთვის გათვალისწინებულია პირდაპირ სისხლისსამართლებრივი პასუხისმგებლობა, ნაცვლად დღეს არსებული ადმინისტრაციული პასუხისმგებლობისა.

როგორც უწყებაში აცხადებენ,  კანონპროექტის მიზანია ოჯახური დანაშაულის, ოჯახში ძალადობის და ქალთა მიმართ ძალადობის წინააღმდეგ ბრძოლის ეფექტიანობის გაზრდა.

ბოლო წლებში საქართველოში ოჯახური ძალადობის ოფიციალურად დარეგისტრირებული შემთხვევების რაოდენობა გაიზარდა. შსს-ში ამას იმით ხსნიან, რომ ძალადობის მსხვერპლნი პოლიციას უფრო ხშირად მიმართავენ.

ყველა ახალი ამბავი
0