თბილისი, 2 მაისი — Sputnik. ჰოლივუდის რეჟისორი ქრისტოფერ კოპოლა იღებს ფილმს ქართული სამზარეულოს შესახებ. ამის შესახებ რეჟისორმა თავის Facebook-გვერდზე დაწერა.
კოპოლას თქმით, ის საქართველოში თავის სტუდენტთან ერთად ჩამოვა, რათა ქართული სამზარეულოს სამყაროში იმოგზაუროს. თავის მოგზაურობას ის არგონავტების მოგზაურობას ადარებს.
„ქართული სამზარეულო უფრო ცეკვას ჰგავს — ხალხურსაცა და ბალეტსაც. თბილისში ჩემი სტუდენტი კერძებს ჩემ მეგობარ ნათია მონტგომერისთან ერთად მოამზადებს, რომელსაც საქართველოში თავისი კულინარიული შოუ აქვს. მოემზადეთ ქართველო ძმებო და დებო! არგონავტები მოდიან. შემომიერთდება ჩემი ქართველი მეგობარი ლაშა ზამბახიძე. მისი მისია თქვენი ოქროს საწმისის მოპარვა იქნება. სინამდვილეში მისი მიზანი იქნება „გადაყლაპოს" რაც შეიძლება მეტი ქართული კულტურა და ხელოვნება. შეიძლება სწორედ ესაა ოქროს საწმისი. ალბათ ასეცაა. მიყვარს თავგადასავლები და ეს ჩემმა სტუდენტებმა იციან", — წერს ქრისტოფერ კოპოლა.
გადაღებების დაწყება ივნისის დასაწყისში იგეგმება. ფილმის ერთ-ერთი მონაწილეა ქართველი კულინარი ნათია მონტგომერი. ჰოლივუდის რეჟისორმა უკვე განათავსა ქსელში ფოტო თავის სტუდენტთან და ქართველ კულინართან ერთად, რაც გადაღებებისთვის მზადებას ადასტურებს.
კოპოლა 2013 წელს ნათიას კულინარიული რუბრიკის სტუმარი იყო პროგრამაში „დილა მშვიდობისა, საქართველო" ტელეკომპანია Rustavi2-ზე. რეჟისორმა პირდაპირ ეთერში მოამზადა ქართული კუპატი, ასევე თეთრი ლობიო პომიდორში.
ნათია მონტგომერის ტელეარხ Food TV geo-ზე მიჰყავს კულინარიული შოუ „ნათია მონტგომერის სამზარეულო".
