თბილისი, 12 სექტემბერი — Sputnik. შსს-ს თანამშრომლებმა 1-11 სექტემბრის პერიოდში ხე-ბუჩქნარის უკანონოდ გაჩეხვის ფაქტზე 19 პირი გამოავლინეს, ხოლო ხე-ტყის პირველადი გადამამუშავებელი ობიექტის (სახერხი საამქროს) ტექნიკური რეგლამენტის მოთხოვნების დარღვევის ფაქტზე 1 პირი ამხილეს, ნათქვამია უწყების ვებ-გვერდზე გავრცელებულ განცხადებაში.
სამართალდამცველებმა მხილებულ პირთა ავტომობილებიდან უკანონოდ მოპოვებული ხის მორები და ფიცრები ამოიღეს, ლაგოდეხის რაიონის სოფელ აფენში გამოვლენილი უკანონო სახერხი საამქრო კი დალუქეს, საიდანაც სამართალდამცველებმა ხე-ტყის გადამამუშავებელი დანადგარი და სხვადასხვა ჯიშის ხის მასალა ამოიღეს.
გამოძიება ხე-ბუჩქნარის უკანონოდ გაჩეხვისა და ხე-ტყის პირველადი გადამამუშავებელი ობიექტის (სახერხი საამქროს) ტექნიკური რეგლამენტის მოთხოვნების დარღვევის ფაქტებზე საქართველოს სსკ-ის 303-ე მუხლით მიმდინარეობს, რაც ისჯება თავისუფლების აღკვეთით ოთხ წლამდე ვადით.
