სასჯელაღსრულების დაწესებულებებში ყველა სახის პაემანი უფასო გახდება

ციხე - Sputnik საქართველო, 1920, 05.12.2022
გამოწერა
НовостиTelegram
ცვლილებების მიხედვით, გარდა საშიშროების მაღალი რისკის მსჯავრდებულებისა, ყველას მიენიჭება უმაღლესი განათლების მიღების უფლება.
თბილისი, 5 დეკემბერი – Sputnik. ახალი პენიტენციური კოდექსის თანახმად, ციხეში ყველა სახის პაემანი სრულიად უფასო გახდება. ამის შესახებ იუსტიციის მინისტრმა რატი ბრეგაძემ განაცხადა.
როგორც მინისტრმა მთავრობის დღევანდელი სხდომის დასრულების შემდეგ განაცხადა, იუსტიციის სამინისტრომ შესაბამისი უწყებების ჩართულობით მოამზადა ახალი პენიტენციური კოდექსის პროექტი, რომელიც პარლამენტს უახლოეს პერიოდში წარედგინება.

„ბრალდებულს მიენიჭება ხანგრძლივი პაემნის უფლება, რომელიც აქამდე არ ჰქონდა. ასევე ყველა სახის პაემანი გახდება სრულიად უფასო. დღეს, მაგალითად, 60 ლარის გადახდა უწევთ სრულწლოვნებს, არასრულწლოვნებს კი 30-ის. შესაბამისად, ეს იქნება საკმაოდ დიდი შეღავათი პატიმრებისა და მათი ოჯახის წევრებისთვის“, – განაცხადა ბრეგაძემ.

ცვლილებების მიხედვით, გარდა საშიშროების მაღალი რისკის მსჯავრდებულებისა, ყველას მიენიჭება უმაღლესი განათლების მიღების უფლება და პროექტი „ციფრული უნივერსიტეტი" ხელმისაწვდომი გახდება მსჯავრდებულთა ფართო მასებისთვის.
ასევე გაიზრდება სატელეფონო საუბრების რაოდენობა და ხანგრძლივობა; გათანაბრდება მსჯავრდებულთა და ბრალდებულთა საცხოვრებელი პირობებიც.
ბრეგაძის განცხადებით, გაუმჯობესდება სპეციალური პენიტენციური სამსახურის თანამშრომელთა შრომითი პირობებიც და პენიტენციურ დაწესებულებებში მყოფ პირთა უფლებრივი მდგომარეობა გადავა უფრო მაღალ ხარისხში.
პენიტენციური სამსახურის ყველა დანაყოფს მიენიჭება სპეციალური სტატუსი, რაც თანამშრომელთა პირობებს გაათანაბრებს და გააუმჯობესებს. გაფართოვდება სპეციალური წოდების მქონე პირთა წრე და ყველა მოსამსახურე, თანამდებობრივი და წოდებრივი სარგოს გარდა, მიიღებს წელთა ნამსახურობის დანამატს.
ყველა ახალი ამბავი
0