რას უნდა ველოდოთ ინფლაციისგან საქართველოში - ექსპერტის მოსაზრება

© photo: Sputnik / Stringerბაზარი
ბაზარი - Sputnik საქართველო, 1920, 07.06.2022
გამოწერა
Yandex newsTelegram
საქართველო იმ ვითარებაშია, როდესაც ინფლაცია მთლიანად „იმპორტირებულია“ საზღვარგარეთიდან და არაა დამოკიდებული ქვეყნის ეკონომიკის მაჩვენებლებზე, მიიჩნევს ექსპერტი.
თბილისი, 7 ივნისი — Sputnik. შემცირდება თუ არა ინფლაცია საქართველოში 9%-მდე 2022 წლის ბოლოს – დამოკიდებულია გარე ფაქტორებზე, განაცხადა ეკონომიკის ექსპერტმა გიორგი ცუცქირიძემ.
მისი აზრით, სურსათის ღირებულება მცირდება, როდესაც ადგილობრივი მოსავალი მწიფდება, რაც, ბუნებრივია, პოზიტიურად აისახება ფასებზე. მაგრამ პროგნოზი ბევრ ფაქტორზეა დამოკიდებული, პირველ რიგში იმაზე, თუ რა ინტენსივობა ექნება რუსულ-უკრაინულ კრიზისს.

„დღეს ჩვენ ვართ ისეთ მოცემულობაში, როცა ინფლაცია მთლიანად გარედანაა „იმპორტირებული“ და ეს ჩვენი ეკონომიკის მაჩვენებლებზე დამოკიდებული არ არის", – განაცხადა ცუცქირიძემ პრეს-კლუბ „კვირაში".

როგორც ექსპერტმა აღნიშნა, ინფლაციის ერთ-ერთი ყველაზე ქმედითი ბერკეტი რეფინანსირების განაკვეთის გაზრდაა.
„მოგეხსენებათ, ეროვნულმა ბანკმა რეფინანსირების განაკვეთი კვლავ 11%-ზე დატოვა. ეს იმას ნიშნავს, რომ საგარეო სექტორში კვლავ გაურკვევლობაა და ეროვნული ბანკი ამ ფაქტორს ითვალისწინებს", – განაცხადა ცუცქირიძემ.
მისი თქმით, გაურკვევლობა, პირველ რიგში, უკრაინაში განვითარებულ მოვლენებს უკავშირდება.
უპრეცედენტო ეკონომიკური ზრდა - პრემიერი მთავრობის ამოცანებზე>>
„მაგალითად, აშშ-ში ფედერალური რეზერვის განაკვეთი ასევე ისტორიულ მაქსიმუმზეა... ჩვენი მოლოდინი მაინც უნდა იყოს იქითკენ, რომ ინფლაციამ წლის ბოლოსკენ გარკვეულწილად შეიძლება დაიწიოს. თუმცა, ვიმეორებ, ეს მთლიანად საგარეო ფაქტორია და შიდა გარემოებებით გამოწვეული ნაკლებადაა", – განაცხადა ცუცქირიძემ.
მან აღნიშნა, რომ გასულ წელსაც მაღალი ინფლაცია იყო. მაშინ ფასების ზრდა პოსტპანდემიური პერიოდისთვის დამახასიათებელ პრობლემებს უკავშირდებოდა, როდესაც გაწყვეტილი იყო რიგი, ძირითადად, სასურსათო პროდუქტების მიწოდების ჯაჭვი.

„იყო მოლოდინი, რომ წელს ინფლაცია შემცირდებოდა. ამის მოლოდინი იყო ევროკავშირში, აშშ-ში, მათ შორის, საქართველოშიც. მაგრამ, მოგეხსენებათ, თებერვლის ბოლოდან უკრაინაში ომი დაიწყო, რამაც ეს ინფლაციური ტრენდი უკან დააბრუნა... ესაა ახალი შოკი, რომელმაც ინფლაცია მაღალ დონეზე დატოვა", – აღნიშნა ექსპერტმა.

ცუცქირიძემ აღნიშნა, რომ ინფლაციის ზრდა ქვეყნებში, რომლებიც საქართველოს ძირითადი სავაჭრო პარტნიორები არიან, ნეგატიურად აისახება შემოტანილი საქონლის ღირებულებაზე და, როგორც წესი, ადგილობრივი წარმოების პროდუქტებზე.
წლიურმა ინფლაციამ (2022 წლის მაისში, გასული წლის მაისთან შედარებით) 13,3% შეადგინა, მიზნობრივი მაჩვენებელია 3%. წელიწადში ფასები გაიზარდა ტრანსპორტზე – 20%, სასტუმროებსა და რესტორნებზე – 12,6%, ჯანდაცვაზე – 2%. მაისში სურსათზე ფასები წლიური 22%-ით გაიზარდა.
საქართველოში ფასები კვლავ მაღალი ტემპებით იზრდება - ახალი სტატისტიკა>>
საქართველოს ეროვნული ბანკის ინფორმაციით, კორონავირუსის პანდემიამ მსოფლიო ეკონომიკა მრავალი სირთულის წინაშე დააყენა და ამ მხრივ ერთ-ერთი მნიშვნელოვანი ფაქტორია ფასების დაჩქარებული ზრდის ტენდენცია, რომელიც ბოლო დროს პრობლემად რჩება როგორც განვითარებად, ისე განვითარებულ ქვეყნებში.
საქართველოს ხელისუფლება ინფლაციის დონის შემცირებას 2022 წლის მეორე ნახევარში ელოდება. ამის შესახებ ეკონომიკისა და მდგრადი განვითარების მინისტრმა ლევან დავითაშვილმა განაცხადა. თუმცა, მისივე თქმით, მსოფლიოში მიმდინარე მოვლენების ფონზე პროგნოზის გაკეთება ძალიან რთულია.
ყველა ახალი ამბავი
0