საქართველოში დანიის საელჩო გაიხსნება
21:52 20.05.2022 (განახლებულია: 23:42 20.05.2022)
© photo: Sputnik / Vladimir Pesnya
/ გამოწერა
დანიის საგარეო საქმეთა მინისტრმა ქართველ კოლეგას საელჩოს გახსნის შესახებ ინფორმაცია პირადად გააცნო.
თბილისი, 20 მაისი — Sputnik. დანიამ საქართველოში საელჩოს გახსნის გადაწყვეტილება მიიღო. ინფორმაცია დანიის საგარეო საქმეთა მინისტრმა იეპე კოფოდიმ საკუთარ twitter-ის გვერდზე გამოაქვეყნა.
კოფოდი საქართველოს საგარეო საქმეთა მინისტრს ილია დარჩიაშვილს იტალიის ქალაქ ტურინში შეხვდა და ინფორმცია საელჩოს გახსნის შესახებ პირადად გააცნო.
„ბრძოლა სტაბილურობისა და დემოკრატიისთვის აღმოსავლეთის ფრონტის ქვეყნებში უფრო მნიშვნელოვანია, ვიდრე ოდესმე. შეგიძლიათ ჩვენი მხარდაჭერის იმედი გქონდეთ", – დაწერა საკუთარი twitter-ის გვერდზე დანიის საგარეო საქმეთა მინისტრმა.
Denmark will open an embassy in Georgia! 🇩🇰🇬🇪
— Jeppe Kofod (@JeppeKofod) May 20, 2022
Great to meet 🇬🇪 colleague FM @iliadarch in Turin today and deliver the news personally
The fight for stability and democracy in eastern front states more important than ever
You can count on our support 🤝#dkpol #Georgia pic.twitter.com/BwnPUZd7hn
საქართველოს საგარეო საქმეთა სამინისტროს ცნობით, შეხვედრაზე მინისტრებმა დადებითად შეაფასეს დანიასა და საქართველოს შორის ორმხრივი თანამშრომლობა, რამაც ბოლო წლებში განსაკუთრებული დინამიკა შეიძინა.
„ხაზი გაესვა საქართველოს და, ზოგადად, ევროკავშირის აღმოსავლეთ სამეზობლოს მიმართ დანიის მხრიდან გამოჩენილ მზარდ ინტერესს და მხარდაჭერას“, – განაცხადეს საგარეო საქმეთა სამინისტროში.
ორი ქვეყნის საგარეო საქმეთა მინისტრები ორმხრივი ურთიერთობების შემდგომი განვითარებისთვის აქტიურ კავშირებზე შეთანხმდნენ.
საქართველოსა და დანიას შორის ორმხრივი დიპლომატიური ურთიერთობები 1992 წლის 1 ივნისს დამყარდა. დანიაში საქართველოს საელჩო 2006 წელს გაიხსნა. ქვეყნები თანამშრომლობენ სავაჭრო-ეკონომიკურ სფეროში, ასევე ტურიზმისა და კულტურის სფეროებში.
