კახა კალაძემ საკრებულოს დეპუტატებს მერიის უახლოესი ოთხი წლის გეგმები გააცნო

© Tbilisi City Hallკახა კალაძე მოსახლეობას ხვდება
კახა კალაძე მოსახლეობას ხვდება - Sputnik საქართველო, 1920, 07.12.2021
გამოწერა
ქალაქის მერის თქმით, თბილისში ყველა ოჯახს საკუთარი საცხოვრებელი ფართი ექნება
თბილისი, 7 დეკემბერი — Sputnik. 2022 წლიდან თბილისის მასშტაბით დაიწყება ავარიული შენობების თანამედროვე და უსაფრთხო შენობებით ჩანაცვლება, განაცხადა თბილისის მერმა კახა კალაძემ.
დღეს კახა კალაძე საკრებულოს სხდომაზე დეპუტატების წინაშე წარდგა და ქალაქის მთავრობის შემადგენლობა წარადგინა. დეპუტატებმა მერის მიერ წარდგენილ კანდიდატებს ნდობა ხუთსაათიანი სხდომის დასასრულს გამოუცხადეს.
„ჩვენ დაგეგმილი გვაქვს, რომ 2022 წლიდან ქალაქის მასშტაბით არსებული საბჭოთა დროინდელი ავარიული შენობები სრულად ჩანაცვლდეს თანამედროვე და უსაფრთხო შენობებით. ჩვენ ვგეგმავთ, რომ არც ერთი თბილისელი ოჯახი არ დარჩეს უსახლკაროდ – ეს არის ჩემი დაპირება. ამისთვის ვქმნით მუნიციპალურ საბინაო ფონდს და თბილისელ ოჯახებს, რომლებსაც დაკარგული აქვთ ან არ გააჩნიათ სახლკარი, სარგებლობის უფლებით გადაეცემათ საცხოვრისი“, – განაცხადა კალაძემ და აღნიშნა, რომ ეს არ ეხება თბილისის ისტორიულ ნაწილს.
მისი თქმით, დასრულდება კოოპერატიული ბინათმშენებლობით დაზარალებულების პროგრამა და ქალაქში დაუსრულებელი მშენებლობების პრობლემა საბოლოოდ მოგვარდება.
თბილისის საკრებულოს შენობა - Sputnik საქართველო, 1920, 07.12.2021
თბილისის საკრებულომ დედაქალაქის მთავრობა დაამტკიცა
კალაძემ საზოგადოებრივი ტრანსპორტის საკითხზეც ისაუბრა და აღნიშნა, რომ თბილისის ავტოპარკს 200 ახალი ავტობუსი შეემატება.
„თანამედროვე, „ჭკვიანი“ საზოგადოებრივი ტრანსპორტის სისტემის საშუალებით ქალაქში ყველა შეძლებს კომფორტულად და სწრაფად გადაადგილებას. ვქმნით ათ სატრანზიტო დერეფანს და ყველა ტიპის საზოგადოებრივი ტრანსპორტის ერთიან სისტემაში სინქრონიზაცია განხორციელდება“, – განაცხადა კახა კალაძემ.
გარდა ამისა, მერის თქმით, უახლოეს ოთხ წელიწადში გაფართოვდება თბილისის მერიის სოციალური და სამედიცინო პროგრამები.
„სოციალური და ჯანდაცვის პოლიტიკის კუთხით ჩვენ გავაფართოებთ შესაბამის პროგრამებს, მათ შორის, ონკომედიკამენტებით უზრუნველყოფის პროგრამას, სკრინინგის პროგრამას, შშმ პირთა პერსონალური დახმარების სერვისებს და დავაფინანსებთ სოციალურად დაუცველი მოსახლეობისთვის მაღალტექნოლოგიურ კვლევებს“, – განაცხადა კახა კალაძემ.
ამავე დროს, მერის თქმით, საარჩევნო დაპირების მიხედვით, 2022 წლიდან თბილისში რეგისტრირებული, სოციალურად დაუცველი პენსიონერებისთვის მედიკამენტებისთვის განკუთვნილი 500-ლარიანი წლიური ვაუჩერის გაცემა დაიწყება.
კახა კალაძე - Sputnik საქართველო, 1920, 07.12.2021
რა შეღავათით ისარგებლებენ თბილისში 60 წელს ზემოთ მოქალაქეები: კალაძის განმარტება
„ვაუჩერების გაცემა დაიწყება 2022 წლიდან. ამ ადამიანებს ექნებათ შესაძლებლობა ეს ვაუჩერი გამოიყენონ წლის განმავლობაში, როგორც მოუხერხდებათ და რა საჭიროებაც ექნებათ. შეუძლიათ, აღნიშნული თანხა მთელი წლის განმავლობაში გამოიყენონ, შეუძლიათ – რამდენიმე თვეზე გაანაწილონ. არანაირი შეზღუდვა არ იქნება“, – აღნიშნა თბილისის მერმა.
მისი თქმით, ეს და სხვა მუნიციპალური პროგრამები პრიორიტეტული იქნება მანამ, სანამ დედაქალაქში სოციალური ცხოვრების დონე არ აიწევს.
კახა კალაძე თბილისის მერად მეორე ვადით მიმდინარე წლის ოქტომბერში აირჩიეს. პირველად ეს პოსტი მან 2017 წლის ნოემბერში დაიკავა.
ყველა ახალი ამბავი
0