თბილისი, 26 ივნისი – Sputnik. ექს-პრემიერ გიორგი გახარიას პარტიის „საქართველოსთვის“ ბათუმის ოფისის მფლობელმა უარი უთხრა პოლიტიკურ ორგანიზაციას ფართის შემდგომ მიქირავებაზე.
ფართის მფლობელმა უარის მიზეზად დაასახელა ინფორმაცია ვაშინგტონში გახარიას და „ნაციონალური მოძრაობის“ დამფუძნებლის, მიხეილ სააკაშვილის შეხვედრის შესახებ. თავად პარტიაში შეხვედრის ფაქტს უარყოფენ.
პარტიამ მომხდარში ხელისუფლების მხრიდან შანტაჟის ნიშნები დაინახა.
„სამწუხაროდ, ეს არ არის პირველი შემთხვევა, როცა ადამიანები ღიად გვიფიქსირებენ, რომ მიუხედავად მათი დიდი სურვილისა, მოგვაქირაონ ოფისი, ვერ ახერხებენ იმ დაშინებისა და შანტაჟის გამო, რომელიც მათ მიმართ ხორციელდება“, - განაცხადა პარტიის რეგიონულმა ლიდერმა ირაკლი მიქელაძემ.
შემთხვევა თუ... გახარია და სააკაშვილი ერთ სასტუმროში გაჩერდნენ >>
მმართველი პარტიის ლიდერების და სახელისუფლებლო მედიების მხრიდან შავი პიარის ტალღა გაძლიერდა პოლიტიკური პარტიების ბოლოდროინდელი რეიტინგების გამოქვეყნების შემდეგ. რეიტინგებმა აჩვენა, რომ გახარიას პარტიამ შექმნიდან ერთ თვეში გაუსწრო თითქმის მთელს ოპოზიციას და მესამე ადგილი დაიკავა.
