თბილისი, 3 ივნისი - Sputnik. გენერალური პროკურატურის წინ საპროტესტო აქციაზე შენობის დაცვასთან შეტაკებების შემდეგ პოლიციამ ცხრა ადამიანი დააკავა.
მათგან ხუთი პირი ხელწერილით გაათავისუფლეს, აცნობეს Sputnik-საქართველოს შსს-ს პრესსამსახურში.
აქციის ორგანიზატორია ოპოზიციური მოძრაობა „დროას“ ლიდერი ელენე ხოშტარია. მას მხარი დაუჭირა რამდენიმე ათეულმა ადამიანმა, მათ შორის მოძრაობა „სირცხვილიას“ და „შეცვალეს“ სამოქალაქო აქტივისტებმა.
პოლიციასთან შეტაკებები მას შემდეგ მოხდა, რაც აქციის მონაწილეებმა შენობაში შეღწევა სცადეს.
ორი სამოქალაქო აქტივისტი ამტკიცებს, რომ პოლიციის ქმედებების შედეგად ხელების მოტეხილობები აქვთ - სამინისტროში ამ ინფორმაციასთან დაკავშირებით კომენტარი არ გაუკეთებიათ.
აქციის მონაწილეები ნინოწმინდის ბავშვთა პანსიონში სახალხო დამცველის შეშვებას მოითხოვენ. დაწესებულების ირგვლივ ბოლო დროს სერიოზული სკანდალი აგორდა.
მანამდე მედიაში გავრცელდა ბავშვებზე ფსიქოლოგიური და ფიზიკური ზეწოლის აღმაშფოთებელი ფაქტები - მაგალითად, რომ აღსაზრდელებს დასჯის მიზნით მუხლებზე აყენებენ და საჭმელს არ აჭმევენ.
წმინდა ნინოს სახელობის ობოლ, უპატრონო და მზრუნველობამოკლებულ ბავშვთა პანსიონი საქართველოს საპატრიარქოს დაქვემდებარებაშია.
სიტუაციას აკონტროლებს სახალხო დამცველი, მაგრამ ნინო ლომჯარიამ და მისი აპარატის თანამშრომლებმა პანსიონის ადმინისტრაციისგან მონიტორინგის ჩასატარებლად ნებართვა ვერ მიიღეს.
ომბუდსმენმა განაცხადა, რომ ბოლო წლებში ამ დაწესებულებასთან დაკავშირებით მისთვის ცნობილია მინიმუმ ოთხი გამოძიების შესახებ. ლომჯარიას მონაცემებით, ერთი საქმე არასრულწლოვანის შესაძლო გაუპატიურების ფაქტს უკავშირდება, დანარჩენი სამი - ბავშვების მიმართ ძალადობის შესაძლო შემთხვევებს.
სხვადასხვა წყაროს მიხედვით, პანსიონში 60-დან 150-მდე ბავშვი იმყოფება. ზოგიერთი მედიასაშუალება ამტკიცებს, რომ ბავშვების უფლებების დარღვევის შესახებ ინფორმაციის ადგილზე გადამოწმება სცადეს, მაგრამ ტერიტორიაზე არ შეუშვეს.
ბოლო დღეებში საქართველოში გაიმართა რამდენიმე აქცია, სადაც შსს-სა და პროკურატურას მოუწოდეს, ნინოწმინდის პანსიონში არსებული სიტუაციის კვალიფიციური გამოძიება განახორციელონ.
აღნიშნულთან დაკავშირებით შსს-მ გაავრცელა საგანგებო განცხადება, სადაც ნათქვამია, რომ პანსიონთან დაკავშირებით გამოძიება ოთხი სისხლის სამართლის საქმეზე მიმდინარეობს.
გამოძიების დაწყების საფუძველი ორ შემთხვევაში სახალხო დამცველის აპარატიდან შესული წერილი, ხოლო დანარჩენ შემთხვევაში სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოდან მომართვა გახდა.
საქართველოს შინაგან საქმეთა სამინისტრომ თითოეულ სისხლის სამართლის საქმეზე უზრუნველყო და განახორციელა საქმის გარემოების დადგენისათვის აუცილებელი ყველა საჭირო საგამოძიებო და საპროცესო მოქმედების ჩატარება. თითოეულ საქმეზე გამოკითხულია არაერთი მოწმე, ჩატარებულია ექსპერტიზა და სხვა მოქმედებები.
უწყებაში აღნიშნავენ, რომ ამ ეტაპზე საქმეში არ არის საკმარის მტკიცებულებათა ის სტანდარტი, რომლითაც შესაძლო დანაშაულის ჩადენის ფაქტი დადგინდება.
მიუხედავად ამისა, შინაგან საქმეთა სამინისტრო თითოეულ სისხლის სამართლის საქმეზე მუდმივ რეჟიმში აგრძელებს საჭირო საგამოძიებო და საპროცესო მოქმედებების ჩატარებას, რათა სრულყოფილად და ობიექტურად იქნეს გამოძიებული დანაშაულის ყველა შესაძლო ჩადენის ფაქტი.
