თბილისი, 3 ივნისი – Sputnik. ჩვენ დავიწყეთ სატრანსპორტო რეფორმის განხორციელება, რათა გარკვეული წლების შემდეგ დედაქალაქში „საცობების" პრობლემა საბოლოოდ გადაწყდეს, განაცხადა თბილისის მერმა კახა კალაძემ ტელეკომპანია „იმედის“ ეთერში.
რა გაკეთდა ბოლო ოთხ წელიწადში – კახა კალაძე თბილისელების წინაშე ანგარიშით წარდგება>>
ბოლო წლებში თბილისში აქტიურად ხორციელდება სატრანსპორტო რეფორმა, რომელიც დედაქალაქის „საცობებისგან“ განტვირთვასთან ერთად მიზნად ისახავს, რომ თბილისელებისთვის მუნიციპალური ტრანსპორტით მგზავრობა უფრო კომფორტული და უსაფრთხო იყოს.
„საცობების" მიზეზი ისაა, რომ დედაქალაქში ავტომობილების რაოდენობა გაიზარდა. ამას, რა თქმა უნდა, თავისი საფუძველი აქვს. თუ 2012 წლამდე თბილისში 125 ათასი კერძო ავტომობილი გადაადგილდებოდა, დღეს 680 ათასზე მეტი მანქანა გადაადგილდება“, – განაცხადა კალაძემ.
დედაქალაქის მერის ინფორმაციით, ეს რიცხვი მზარდია, იმპორტირებული ავტომობილების რაოდენობა ყოველწლიურად 6%-ით იზრდება.
კალაძის განცხადებით, თბილისში არის ისეთი ქუჩები, რომელთა გაფართოება შეუძლებელია. ამასთან, რაც უფრო აფართოებ ქუჩებს, თუ ამის შესაძლებლობაა, კიდევ უფრო ჩიხში შედის პრობლემა, რადგან ეს გარკვეული წახალისებაა კერძო ავტომობილებისთვის.
„ერთადერთი სწორი გზა ამ პრობლემის მოგვარების არის რეფორმა, რომელიც ჩვენ წამოვიწყეთ. ჩვენ შეიძლება დღეს შედეგი ვერ დავინახოთ, მაგრამ გრძელვადიან პერსპექტივაში „საცობების" პრობლემა იქნება მოგვარებული“, – აღნიშნა კალაძემ.
კალაძის თქმით, ამ სისტემაში დღეს რთული ვითარებაა, რეფორმა ახლახან დაიწყო და ის გრძელვადიანია, თუმცა მერი იმედოვნებს, რომ შედეგი ახლო მომავალში დადგება.
„კომფორტულ პოზაზე და პიარულად ქულების დაწერაზე უარი ვთქვით. შეგვეძლო გვეთქვა, რომ ავტობუსები ჩავანაცვლეთ და ნახეთ, რა მაგრები ვართ. მაგრამ ამით რეალურად პრობლემა არ მოგვარდება. მოსახლეობას თვალში ნაცარს ხომ არ შევაყრით“, – განაცხადა კალაძემ.
დედაქალაქში არსებულ პრობლემებზე ისაუბრა ასევე დედაქალაქის ვიცე-მერმა ირაკლი ხმალაძემ. მან აღნიშნა, რომ პიკის საათი საზოგადოებრივი ტრანსპორტისთვის არ უნდა არსებობდეს.
„ჭავჭავაძის გამზირი ზუსტად შეესაბამება ამ სტანდარტს, სადაც პიკის საათი საზოგადოებრივ ტრანსპორტს არ აფერხებს. სატრანსპორტო დერეფანი არის თანაბრად გადანაწილებული ძველი დიზაინისგან განსხვავებით, სადაც 90% ათვისებული ჰქონდა კერძო სატრანსპორტო საშუალებებს“, – განაცხადა ხმალაძემ.
კალაძე: ეს ქალაქი არის ყველასთვის>>
ხმალაძის განცხადებით, აღნიშნულ მონაკვეთზე ახლა საზოგადოებრივ ტრანსპორტს აქვს თავისი, დამოუკიდებელი დერეფანი და შეფერხების გარეშე გადაადგილდება.
ვიცე-მერის ინფორმაციით, მერიის მიზანია დედაქალაქში ათი სწრაფი დერეფანი მოეწყოს ისე, რომ პიკის საათი არ აფერხებდეს საზოგადოებრივი ტრანსპორტის მოძრაობას.
სატრანსპორტო რეფორმის ფარგლებში, „საცობების" თავიდან აცილების მიზნით, თბილისის მასშტაბით ინერგება გონიერი („ჭკვიანი“) სატრანსპორტო სისტემა. „ჭკვიანი“ შუქნიშნების სინქრონიზებული სისტემა შეამცირებს გზებზე „საცობების“ რაოდენობას და ხელს შეუწყობს საგანგებო მომსახურების (სასწრაფო სამედიცინო დახმარების, სახანძრო) მანქანების შეუფერხებლად გადაადგილებას.
გარდა ამისა, საავტომობილო გზებზე ტრანსპორტის შეუფერხებლად გადაადგილების მიზნით მიმდინარე წლის იანვარში დედაქალაქის მერიამ მიიღო გადაწყვეტილება, რომ საკომუნიკაციო ქსელებზე მომუშავე კომპანიები, ავარიული შემთხვევების გარდა, სამუშაოების წარმოებას მხოლოდ ღამის საათებში განახორციელებენ.
