თბილისი, 26 მაისი – Sputnik. საქართველოს დამოუკიდებლობის 103 წლისთავისადმი მიძღვნილ ღონისძიებებს პოლონეთის პრეზიდენტი ანჯეი დუდა დაესწრება, იუწყება ტელეკომპანია „რუსთავი 2“.
პოლონეთის პრეზიდენტი ანჯეი დუდა მეუღლესთან ერთად ოთხშაბათს, 26 მაისს თბილისს ორდღიანი ვიზიტით ეწვია.
პოლონეთის პრეზიდენტის ვიზიტი საქართველოს დამოუკიდებლობის დღის საზეიმო აღნიშვნას ეძღვნება. იმ ოფიციალურ პირთა შორის, ვინც თავისუფლების მოედანზე დაგეგმილ საზეიმო ღონისძიებაზე სიტყვით გამოვა, იქნება პოლონეთის პრეზიდენტიც. ანჯეი დუდა ასევე დაესწრება დამოუკიდებლობის დღისადმი მიძღვნილ გალაკონცერტს თბილისის ოპერისა და ბალეტის სახელმწიფო თეატრში.
ვიზიტის მეორე დღეს, 27 მაისს ანჯეი დუდა შეხვდება საქართველოს პრეზიდენტ სალომე ზურაბიშვილს, პრემიერ-მინისტრ ირაკლი ღარიბაშვილსა და პარლამენტის თავმჯდომარეს კახა კუჭავას.
საქართველოს ისტორიაში 26 მაისი ისტორიული თარიღია — ამ დღეს 1918 წელს საქართველოს პირველმა დემოკრატიულმა მთავრობამ ნოე ჟორდანიას მეთაურობით ქვეყნის დამოუკიდებლობა გამოაცხადა. პირველმა დამოუკიდებელმა რესპუბლიკამ მხოლოდ ორ-ნახევარი წელი იარსება.
