თბილისი, 30 აპრილი – Sputnk. მომღერალმა თიკა მახალდიანმა ტელეკომპანია „მთავარი არხის“ გადაცემა „სხვა ნანუკაში“ დედის ტრაგიკულად გარდაცვალების დღე გაიხსენა, როდესაც 50 წლის ქალი ბრმა ტყვიას ემსხვერპლა.
„ჯერ კიდევ არ მაქვს გაცნობიერებული რა მოხდა. ხანდახან არ მჯერა. თამუნა ყველას მეგობარი იყო… მე მეუღლესთან და შვილთან ერთად ვცხოვრობ. კარანტინის პერიოდში თვე-ნახევარი არ გვყავდა ნანახი თამუნა. არც ის მოდიოდა და ჩვენც არ მივდიოდით. იმ ღამეს დივანზე იჯდა, ხელში ტელეფონი ეჭირა. ამ ტრაგედიამდე რამდენიმე წუთით ადრე ველაპარაკე. ბავშვსაც ესაუბრა“, - განაცხადა თიკა მახალდიანმა.
როგორც მახალდიანი აცხადებს, ოჯახის წევრებმა ჯერ შუშის მსხვრევის ხმა გაიგონეს, ხოლო ოთახში შესულებს ოჯახის დიასახლისი უკვე დივანზე დავარდნილი დახვდათ.
მისი თქმით, ქალს თავი ჰქონდა გადავარდნილი და ეგონათ, რომ გული წაუვიდა. კლინიკაში მიყვანამდე გარდაიცვალა.
თიკა მახალდიანის დედა 19 აპრილს, საღამოს ვაჟა-ფშაველას გამზირზე მომხდარმა ტრაგედიამ შეიწირა. სხვა კორპუსიდან გასროლილ ბრმა ტყვიას საკუთარ სახლში მყოფი 50 წლის თამარ ანთელავას სიცოცხლე ემსხვერპლა. ის მე-8 სართულზე მდებარე ბინაში ტელევიზორს უყურებდა, რა დროსაც ტყვიამ მისი ფანჯარა ჩაამსხვრია და ქალს თავის არეში მოხვდა.
ფაქტზე შსს-ს თანამშრომელი დააკავეს. აღმოჩნდა, რომ ის შემთხვევის დროს ნასვამ მდგომარეობაში იმყოფებოდა და საკუთარი სახლის აივნიდან რამდენჯერმე გაისროლა.
შინაგან საქმეთა სამინისტროს თანამშრომელს, რომელმაც 19 აპრილს, აღდგომის დღესასწაულზე ბრმა ტყვიით მოპირდაპირე კორპუსში მცხოვრები ქალი იმსხვერპლა, მოგვიანებით პროკურატურამ ბრალი დაუმძიმა, მას წარდგენილი აქვს მკვლელობის ბრალდება საქართველოს სსკ-ის 108-ე მუხლით, რაც სასჯელის ზომად შვიდიდან თხუთმეტ წლამდე თავისუფლების აღკვეთას ითვალისწინებს.
