თბილისი, 21 აპრილი - Sputnik. მომღერალი და ტელეწამყვანი ქეთი ორჯონიკიძე თიკა მახალდიანის დედის გარდაცვალებსათან დაკავშირებით სოციალურ ქსელში წერს. მისი თქმით, მომხდარი შემთხვევითობა არაა და ეს უპასუხისმგებლობის, დაუსჯელობის სინდრომით შეპყრობილი ადამიანის საქციელია.
„არ შემიძლია არ გამოვთქვა საშინელი სიბრაზე იმ ანომალიურ ადამიანთან დაკავშირებით, ვინც მუცელი ჩაიღორა, გამოვიდა და სროლა ატეხა გასართობად, რასაც შემდგომში უდანაშაულო ადამიანის სიცოცხლე შეეწირა. გაუფრთხილებლობით სიცოცხლის მოსპობას ითვალისწინებსო თურმე ის მუხლი, რომელიც წაუყენეს, რაც მაქსიმუმ 2-დან 4 წლამდე პატიმრობას იმსახურებსო. სად არის აქ გაუფრთხილებლობა? მთვრალი რომ იარაღს ისვრი, ეს გაუფრთხილებლობაა? ან ასეთი უტვინო საქციელით რომ ადამიანს შეიწირავ, უნდა გინდოდეს განა ეს სასჯელი თვითონ?“ - წერს მომღერალი.
თიკა მახალდიანის დედა 19 აპრილს, საღამოს ვაჟა-ფშაველას გამზირზე მომხდარმა ტრაგედიამ შეიწირა. მიმდებარე კორპუსიდან გასროლილ ბრმა ტყვიას საკუთარ სახლში მყოფი 50 წლის თამარ ანთელავას სიცოცხლე ემსხვერპლა. ის მე-8 სართულზე მდებარე ბინაში ტელევიზორს უყურებდა, რა დროსაც ტყვიამ მისი ფანჯარა ჩაამსხვრია და ქალს თავის არეში მოხვდა.
ფაქტზე შსს-ს თანამშრომელი დააკავეს. აღმოჩნდა, რომ ის შემთხვევის დროს ნასვამ მდგომარეობაში იმყოფებოდა და საკუთარი სახლის აივნიდან რამდენჯერმე გაისროლა.
შინაგან საქმეთა სამინისტროს თანამშრომელს, რომელმაც 19 აპრილს, აღდგომის დღესასწაულზე ბრმა ტყვიით მოპირდაპირე კორპუსში მცხოვრები ქალი იმსხვერპლა, შინაპატიმრობა ან 4 წლამდე თავისუფლების აღკვეთა ელოდება.
აღნიშნულ სასჯელს ითვალისწინებს სსკ-ის 116-ე მუხლი, რაც გულისხობს სიცოცხლის მოსპობას გაუფრთხილებლობით.