თბილისი, 17 აპრილი - Sputnik. ქალაქ ბოლნისსა და სოფელ რაჭისუბანში მკაცრი საკარანტინო შეზღუდვები ამოქმედდა, განაცხადა რეგიონული განვითარების საკითხებში პრემიერ-მინისტრის მრჩეველმა სოზარ სუბარმა მთავრობის ადმინისტრაციაში გამართულ ბრიფინგზე.
საქართველოში Covid-19-ით კიდევ ერთი ექიმი დაინფიცირდა>>
ბოლნისის მუნიციპალიტეტში კორონავირუსით ინფიცირების შემთხვევები ბოლო დროს მკვეთრად გაიზარდა – ბოლო 24 საათში კორონავირუსი აქ 19 პირს დაუდასტურდა, მათ შორის არიან სამედიცინო პერსონალის ხუთი წარმომადგენელი, ერთი სასულიერო პირი და ასევე მუნიციპალიტეტის თანამშრომელი.
აღნიშნული საკარანტინო პირობები მოქალაქეთა თავისუფალი გადაადგილების შეზღუდვას ითვალისწინებს, ასევე ქალაქ ბოლნისსა და სოფელ რაჭისუბანს მუნიციპალიტეტის სხვა დასახლებულ პუნქტებთან ურთიერთობა აეკრძალა.
სუბარის განცხადებით, ამ ორი დასახლებული პუნქტის დაკეტვის გადაწყვეტილება უშუალოდ ქალაქ ბოლნისში ინფიცირებულთა რიცხვის მკვეთრ ზრდას უკავშირდება.
„ბოლნისის მუნიციპალიტეტი გამოცხადებული გვაქვს მკაცრ საკარანტინო ზონად, თუმცა, იმის გამო, რომ იქ გავრცელების პატარა კერები იჩენდა თავს, მივიღეთ გადაწყვეტილება და გამოვყავით რამდენიმე ადგილი, რომლებსაც მუნიციპალიტეტის სხვა დასახლებულ ადგილებთან ურთიერთობა აეკრძალა. დღეს მივიღეთ გადაწყვეტილება ქალაქ ბოლნისთან და სოფელ რაჭისუბანთან დაკავშირებით“, - განაცხადა სუბარმა.
ასევე ცალკე საკარანტინო ზონად გამოცხადდა ქალაქი კაზრეთი და სოფელი ბალიჭები. როგორც პრემიერის მრჩეველმა აღნიშნა, ამ ადგილზე კომპანია „არემჯი“ მუშაობს, თავს იყრის ბევრი ადამიანი და ინფექციის გავრცელების საფრთხე უნდა გამოირიცხოს.
აღნიშნულის შესახებ საქართველოს შინაგან საქმეთა სამინისტრომაც გაავრცელა განცხადება, სადაც აღნიშნულია, რომ ქალაქ ბოლნისისა და სოფელ რაჭისუბნის შესასვლელებსა და გასასვლელებში ხუთი დამატებითი საკონტროლო-გამშვები პუნქტი მოეწყო.
მარნეული და ბოლნისი საქართველოში პირველი მუნიციპალიტეტები აღმოჩნდა, სადაც კარანტინი გამოცხადდა. ამ დროისთვის საკარანტინო რეჟიმი ქვეყნის მთელ ტერიტორიაზე მოქმედებს.
„იტალია არ განმეორდება, იქნება ბევრად უარესი...“ - გიორგი კეკელიძე>>
მთავრობის სპეციალურ ვებ-გვერდზე stopcov.ge განთავსებული ბოლო მონაცემებით, საქართველოში კორონავირუსის დიაგნოზი დაუსვეს 370 ადამიანს. საქართველოს სამი მოქალაქე უცხოეთიდან ჩამოიყვანეს. გამოჯანმრთელდა 79 ადამიანი, გარდაიცვალა – 3. კარანტინში იმყოფება 5035, ხოლო სტაციონარებში მედიკოსთა დაკვირვების ქვეშ 540 პაციენტია.
