ნატა პატარაია
თბილისში საპროტესტო აქციების ფონზე რუსეთმა საქართველოსთან პირდაპირი ავიამიმოსვლა აკრძალა, ხოლო რუსმა ტუროპერატორებმა შეწყვიტეს განაცხადების მიღება საქართველოში გამგზავრებასთან დაკავშირებით.
იქიდან გამომდინარე, რომ ბოლო დრომდე საქართველოში ტურისტების რაოდენობით რუსები პირველ ადგილზე იყვნენ, ქვეყნისთვის მიყენებულმა ზარალმა შეიძლება 750 მილიონი დოლარი შეადგინოს.
ტურიზმის ბიზნესისთვის ზიანის შესამსუბუქებლად საქართველოს მთავრობამ მიიღო გადაწყვეტილება – უზრუნველყოს მცირე სასტუმროებისთვის საბანკო სესხების პროცენტების თანადაფინანსება. საუბარია ასევე ტურისტული სექტორისთვის საკრედიტო-საგარანტიო სქემის ამუშავებაზე და მარკეტინგული ღონისძიებების დაფინანსებაზე.
ხელისუფლების ეს ინიციატივა დადებითად შეაფასა ეკონომიკის დოქტორმა იოსებ არჩვაძემ. მისი აზრით, ადამიანურ დონეზე, რა თქმა უნდა, მისასალმებელია მსგავსი გადაწყვეტილება, თუმცა შეიძლება სასურველი შედეგი ვერ მოიტანოს.
„როცა ვინმე გასაჭირშია, დახმარების ხელის გაწვდენა ჰუმანური აქტია, მით უმეტეს, როცა ამას სახელმწიფო აკეთებს საკუთარი მოქალაქეებისთვის. სახელმწიფოს ფუნქციაც ეს არის – მაქსიმალურად დაიცვას საკუთარი მოქალაქეების პოლიტიკურ-ეკონომიკური ინტერესები გარეშე ფაქტორებისგან. თუმცა ეს პრობლემა იმდენად სერიოზულია, რომ უფრო რადიკალური ზომების მიღებას საჭიროებს“, – განაცხადა იოსებ არჩვაძემ „Sputnik-საქართველოსთან“ საუბრისას.
იოსებ არჩვაძის განმარტებით, მთავრობის ინიციატივა საბანკო პროცენტში თანადგომას გულისხმობს და არა მთლიანად თანხის გადახდას, ხოლო თუ ტურისტი ბევრი არ იქნება, სესხის ამღებს გაუჭირდება არა თუ პროცენტის გადახდა, არამედ აღებული ვალისაც.
მისი თქმით, მართალია ბოლო დროს მასმედიაში საუბრობენ იმაზეც, რომ საქართველოში ჩამოსული რუსი ტურისტები ევროპელებთან შედარებით ნაკლებს ხარჯავდნენ, მაგრამ მათი დახარჯული თანხა წვრილ და საშუალო ბიზნესს რჩება, ხოლო ევროპელების – მსხვილ კომპანიებს.
მაგალითად, ერთი რუსი ტურისტი დაახლოებით სამჯერ ნაკლებს ხარჯავს, ვიდრე ერთი ესპანელი. მაგრამ ევროპიდან ჩამოსული ტურისტები შედარებით მაღალვარსკვლავიანი სასტუმროების კონტინგენტს წარმოადგენენ და მათ მიერ გადახდილი თანხა მსხვილი ბიზნესის ჯობეში მიდის, ხოლო რუსული ტურისტული ნაკადი ჰოსტელებზე და შედარებით იაფ სასტუმროებზეა ორიენტირებული და, შესაბამისად, მათ მიერ დახარჯული ფული წვრილ და საშუალო ბიზნესს რჩება. ამიტომ აისახება რუსეთიდან ტურისტული ნაკადის შემცირება ძირითადად საშუალო და მცირე სასტუმროების მფლობელებზე
„თუ ტურისტული ნაკადი არ შემოვიდა, ეს სერიოზული პრობლემაა. აქ უფრო რადიკალურ ზომების მიღებაა საჭირო და რამდენად არის მზად ამისთვის მთავრობა ან რამდენად უნდა იკოსროს მან ეს, ვფიქრობ, განსჯის საგანია“, – აღნიშნა იოსებ არჩვაძემ.
ისინი, ვინც მცირე თუ საშუალო სასტუმროს აშენება დაიწყო, მაგრამ ქვეყანაში განვითარებული მოვლენების გამო შიშობს, შეძლებს თუ არა აღებული ბიზნეს-სესხის გასტუმრებას, საქართველოს პრემიერ-მინისტრმა მამუკა ბახტაძემ დააიმედა.
პრემიერის თქმით, ხელისუფლებამ მეწარმეების დასახმარებლად ძალიან მნიშვნელოვანი ინსტრუმენტი აამოქმედა.
„მექანიზმი, რომელიც შევქმენით ევროკავშირთან ერთად, ეს არის საკრედიტო-საგარანტიო სქემა. ის სრულად იქნება მიმართული ჩვენს მეწარმეებზე, რომლებიც დასაქმებული არიან სასტუმროს სექტორში. ანუ ყველა პროექტს, რომლის მშენებლობაც იგეგმებოდა და ახლა შეიძლება ჰქონდეს ბარიერი, რადგან გამოწვევები არსებობს, ჩვენ დავეხმარებით სახელმწიფო გარანტიით, რათა აუცილებლად დასრულდეს“, – აღნიშნა ბახტაძემ.
საქართველო–რუსეთს შორის პირდაპირი ავიამიმოსვლის გაუქმების საკითხზე რუსეთის საგარეო საქმეთა მინისტრის მოადგილემ გრიგორი კარასინმა ისაუბრა საინფორმაციო სააგენტო РИА Новости-სთან ინტერვიუში.
„რაც შეეხება 8 ივლისიდან ძალაში შესულ რუსეთის პრეზიდენტის ბრძანებულებას, რომლის თანახმად, საქართველოში ავიაგადაზიდვები აიკრძალა, იგი დროებით ხასიათს ატარებს. მისი გაუქმების პირობები ნათლად არის გაწერილი: საქართველოში სტაბილიზაცია, რუსოფობიური კამპანიის შეწყვეტა და ჩვენი ქვეყნის მოქალაქეების უსაფრთხოებისთვის არსებული ნებისმიერი სახის საფრთხეების აღმოფხვრა", – განაცხადა რუსეთის საგარეო უწყების წარმომადგენელმა.
ტურიზმის ეროვნული ადმინისტრაციის მონაცემებით, 2019 წლის პირველ ექვს თვეში საქართველოს მიერ საერთაშორისო მოგზაურებისგან მიღებულმა შემოსავალმა 1,5 მლრდ დოლარი შეადგინა (+7%).
როგორ აისახება ბოლოდროინდელი მოვლენები ტურიზმის სფეროზე, აგვისტოში გამოჩნდება, როდესაც ივლისის მონაცემები შეჯამდება. სპეციალისტები სასტუმროების ჯავშნების რაოდენობის მკვეთრ შემცირებაზე უკვე საუბრობენ.
