თბილისი, 9 ივნისი — Sputnik. მთაწმინდის რაიონში, სადაც მოქალაქეები მეორე ტურში პარლამენტის დეპუტატს ირჩევდნენ, დასრულებულია - 31 უბანი დაიხურა და კომისიებმა ხმების დათვლა დაიწყეს.
მთაწმინდაზე ამომრჩეველთა აქტივობამ 17:00 საათისთვის 32,5% შეადგინა >>
მეორე ტურის ჩატარება საჭირო მას შემდეგ გახდა, როდესაც 20-დან ვერცერთმა კანდიდატმა გამარჯვებისთვის საჭირო ხმების რაოდენობა ვერ მოიპოვა - არჩევნებში მონაწილე ამომრჩევლების ხმების მინიმუმ 50% პლუს ერთი ხმა.
შუალედური არჩევნების მეორე ტურში ერთმანეთს დაუპირისპირდნენ მმართველი პარტია „ქართული ოცნება - დემოკრატიული საქართველოს“ კანდიდატი ვლადიმერ (ლადო) კახაძე („41“ ნომრად) და ორი ოპოზიციური პარტიის - „ევროპული საქართველოსა“ და „თავისუფალი დემოკრატების“ კანდიდატი, ადვოკატი შალვა შავგულიძე (ნომერი „13“).
მთლიანობაში არჩევნები მშვიდ, თუმცა გარკვეულ წილად დაძაბულ ვითარებაში ჩატარდა. ამომრჩეველთა აქტივობა საკმაოდ მაღალი იყო - 17:00 საათისთვის საარჩევნო უბნებზე მივიდა თითქმის იმდენივე ამომრჩეველი, რამდენიც პირველ ტურში მთელი დღის განმავლობაში.
დღის განმავლობაში სერიოზული დარღვევა არ დაფიქსირებულა, თუმცა საარჩევნო უბნებთან რამდენიმე ინციდენტი მოხდა.
ერთადერთი სერიოზული შემთხვევა მოხდა მე-17 უბანთან, სადაც მმართველი პარტია „ქართული ოცნება - დემოკრატიული საქართველოს“ მხარდამჭერი დამკვირვებელს ფიზიკური ანგარიშსწორებით ემუქრებოდა. ის დააკავეს და სისხლის სამართლის საქმე აღძრეს.
ვინ დაესხა თავს თამარ ჩერგოლეიშვილის და გიორგი ბარამიძის შვილებს >>
საღამოსთვის სიტუაცია დაიძაბა - გამოცემა „ტაბულას“ რედაქტორმა თამარ ჩერგოლეიშვილმა და „ერთიანი ნაციონალური მოძრაობის“ ერთ-ერთმა ლიდერმა გიორგი ბარამიძემ განაცხადეს, რომ მათ ქალიშვილებს, რომლებიც არჩევნებზე დამკვირვებლების სტატუსით იმყოფებოდნენ, მე-18 უბანთან მმართველი პარტიის მხარდამჭერი დაესხა თავს. შსს-ს კომენტარი არ გაუკეთებია, თუმცა პირველი არხი იუწყებოდა, რომ აღნიშნულ ინციდენტზე შსს-მ გამოძიება დაიწყო - საქმე აღიძრა სსკ-ის 162-ე პრიმა მუხლით, რაც გულისხმობს კენჭისყრის შენობაში ან მის მიმდებარედ ძალადობის განხორციელებას ან ძალადობის შემცველ მუქარას.
