თბილისი, 20 თებერვალი – Sputnik. ამერიკული AF&Co, რომელიც რესტორნისა და მასპინძლობის სფეროს წამყვანი კომპანიაა, 2019 წლის ტენდენციებში ქართულ კერძებს წლის სამზარეულოდ ასახელებს, ხოლო აჭარულ ხაჭაპურს – წლის კერძად, იუწყება აჭარის ტურიზმის დეპარტამენტი.
„აჭარული ხაჭაპური წლის კერძად თავისი გემოს – ყველისა და კვერცხის ნაზავის, ასევე ინსტაგრამზე ხშირი პოსტების წყალობით დასახელდა“, – აღნიშნულია დეპარტამენტის განცხადებაში.
ეს ხაჭაპურის მორიგი წარმატებაა საერთაშორისო არენაზე. ის სულ უფრო პოპულარული საკვები ხდება მსოფლიოში. ხაჭაპურსა და ქართულ კერძებს სტატიებს უძღვნიან ისეთი სახელგანთქმული გამოცემები, როგორიცაა Ny.eater, Forbes, The Guardian, New York Times, BBC.
წელს ხაჭაპურის ტრადიციას არამატერიალური კულტურული მემკვიდრეობის ძეგლის სტატუსი მიენიჭა.
