თბილისი, 31 ოქტომბერი — Sputnik. წინასწარი მონაცემებით, საქართველოში ეკონომიკის რეალურმა ზრდამ 2018 წლის სექტემბერში, 2017 წლის ანალოგიურ პერიოდთან შედარებით, 5,6% შეადგინა, აღნიშნულია საქართველოს სტატისტიკის ეროვნული სამსახურის მასალებში.
მიმდინარე წლის მესამე კვარტალში ეკონომიკურმა ზრდამ 4% შეადგინა, ხოლო ცხრა თვეში - 4,9%.
ზრდა სექტემბერში დაფიქსირდა გადამამუშავებელ მრეწველობაში, ფინანსურ საქმიანობაში, ვაჭრობაში, უძრავ ქონებასთან დაკავშირებულ ოპეარციებში, ტრანსპორტის, სასტუმროებისა და რესტორნების სფეროებში.
საქართველოს ეროვნული ბანკის ინფორმაციით, ქვეყნის ეკონომიკის ზრდის ძირითადი მიზეზებია ექსპორტის, ტურიზმიდან შემოსავლებისა და უცხოეთიდან ფულადი გადმორიცხვების ზრდა.
ექსპერტი ეკონომიკურ საკითხებში დემურ გიორხელიძე მიიჩნევს, რომ თვის მაჩვენებელს, რომელსაც გასული წლის შესაბამის თვესთან ადარებენ, განსაკუთრებული მნიშვნელობა არა აქვს.
„ეს პროცენტი გასული წელთან შედარებით ძირითადი პროცენტი არაა, სინამდვილეში არც არაფერს ამტკიცებს და არც არაფერს აჩვენებს. წლიური პროცენტი დაახლოებით ვიცით - ეს დაახლოებით 5%-ია, ეს კი 14-მილიარდიანი ეკონომიკისთვის ცოტა ზრდაა. ეს მშვენიერია ამერიკის შეერთებული შტატებისთვის, ან გერმანიის ეკონომიკისთვის, მაგრამ არა საქართველოსთვის", - განუცხადა გიორხელიძემ „Sputnik-საქართველოს".
საერთაშორისო სავალუტო ფონდის (სსფ) მისიამ, რომელმაც საქართველოში ვიზიტი ორშაბათს დაასრულა, ქვეყანაში ეკონომიკური ზრდის პროგნოზი 5,5%-იდან 5%-მდე შეამცირა.
„მიუხედავად ექსპორტის, ტურიზმისა და ფულადი გადმორიცხვების მნიშვნელოვანი ზრდისა, მიმდინარე ანგარიშის დეფიციტი, როგორც მოსალოდნელია, 2018-2019 წლებში, ნავთობზე უფრო მაღალი ფასების ხარჯზე, რამდენადმე გაიზრდება", - ნათქვამია პრეს-რელიზში ვიზიტის შედეგების მიხედვით.
დოკუმენტში აღნიშნულია, რომ, მიუხედავად ეკონომიკის ზრდის ტემპერბის შემცირებისა, მოკლევადიან პერსპექტივაში ეკონომიკური ზრდა დაჩქარდება, რასაც ხელს შეუწყობს ხელისუფლების მიერ გატარებული სტრუქტურული რეფორმები.
