თბილისი, 13 აგვისტო — Sputnik. რუსეთის საგარეო საქმეთა მინისტრის მოადგილემ გრიგორი კარასინმა გამოთქვა შეშფოთება საქართველოში შვეიცარიის საელჩოსთან რუსეთის ფედერაციის ინტერესთა სექციის ირგვლივ არსებული მდგომარეობის გამო.
მანამდე ინტერესთა სექციის უფროსმა ევგენი კონიშევმა „Sputnik-საქართველოსთან“ ინტერვიუში განაცხადა, რომ რუსეთის საკონსულო განყოფილების შენობასთან მუდმივად მოქმედებს პირთა გარკვეული ჯგუფი, რომელიც შეგნებულად ამწვავებს ვითარებას, ქმნის ალტერნატიულ რიგებს და ამით რუსული მისიის მუშაობას აფერხებს.
ორშაბათს გაიმართა კარასინის შეხვედრა რუსეთში შვეიცარიის ელჩთან ივ როსიესთან, სადაც ეს პრობლემა განიხილებოდა.
„გრიგორი კარასინმა ხაზი გაუსვა საქართველოში შვეიცარიის საელჩოში გახსნილ, რუსეთის ინტერესების სექციის ირგვლივ გაუარესებულ ვითარებას, რაც ადგილობრივი კრიმინალური ელემენტების ქმედებების შედეგია, რომლებიც საქართველოს მოქალაქეებს შორის რუსულ ვიზებზე გაზრდილ მოთხოვნაზე ხელს ითბობენ“, — ნათქვამია რუსეთის საგარეო საქმეთა სამინისტროს განცხადებაში.
როსიე დაჰპირდა, რომ შვეიცარიის მხრიდან იქნება გადადგმული ნაბიჯები, რათა უზრუნველყოფილი იყოს წესრიგი.
საქართველო რუსეთთან სავაჭრო ურთიერთობების განვითარებას აპირებს >>
რუსეთის ინტერესებთა სექციამ უკვე მიმართა საქართველოს ხელისუფლებას საკონსულო განყოფილების მიმდებარე ტერიტორიაზე წესრიგის აღდგენის თხოვნით. როგორც კონიშევმა აღნიშნა, შესაბამისი მიმართვა ადგილობრივ ხელისუფლებას მიმდინარე წლის 25 ივლისს გადაეგზავნა.
