თბილისი, 17 ივლისი — Sputnik. ლეგენდარული ანსამბლი „ივერიის" ცნობილი მიუზიკლი „ჩხიკვთა ქორწილი" შეკვეთილში, Black Sea Arena-ს სცენაზე 28 აგვისტოს იქნება წარმოდგენილი, იუწყებიან ორგანიზატორები.
ეს ქართული მიუზიკლის კავკასიის მასშტაბით ასეთ დიდ სცენაზე წარმოდგენის პირველი შემთხვევა იქნება.
როგორც ორგანიზატორები აღნიშნავენ, „ჩხიკვთა ქორწილი" 40 წლის განმავლობაში თითქმის 800-ჯერ იყო წარმატებით წარმოდგენილი. ალექსანდრე ბასილაიასა და ჯემალ ბაღაშვილის სპექტაკლმა უზარმაზარი პოპულარობა მოიპოვა როგორც საქართველოში, ისე მის ფარგლებს გარეთ.
„რიყის პარკი ქუჩის მუსიკოსებს სექტემბრამდე უმასპინძლებს">>
„მიუზიკლი, რომელზეც თაობები გაიზარდა! ღონისძიება, რომელზეც შეგიძლიათ ოჯახთან ერთად წახვიდეთ და მიიწვიოთ თქვენი უცხოელი მეგობრები, ალექსანდრე ბასილაიას უკვე კლასიკად ქცეული ცნობილი კომპოზიციები, რომელსაც არა მხოლოდ საქართველოში მღერიან…", — ნათქვამია მიუზიკლის ანონსში.
მიუზიკლში როლებს ასრულებენ: თემურ წიკლაური, ნუგზარ კვაშალი, ჯემალ ბაღაშვილი, ნუცა ბუზალაძე, ანდრია გველესიანი, ბორის ბედია, ხვიჩა მაღლაკელიძე და სხვები.
ვაჟა-ფშაველას ნაწარმოებების მოტივებზე შექმნილი „ჩხიკვთა ქორწილის" მუსიკის ავტორია ალექსანდრე ბასილაია, ლიბრეტოს ავტორები არიან ჯემალ ბაღაშვილი და ავთანდილ გელოვანი, მხატვრები — ანი ნინუა და ნინო სურგულაძე. დადგმაზე მუშაობდნენ ქორეოგრაფები კოტე ფურცელაძე და ფრიდონ სულაბერიძე.
წარმოდგენა დაიწყება 21:00 საათზე. ბილეთების შეძენა შესაძლებელია ვებ-გვერდზე www.tkt.ge.
სპექტაკლის მიხედვით 1984 წელს რეჟისორებმა ევგენი გინზბურგმა და ლეონიდ კოსტიუკმა გადაიღეს სატელევიზიო ფილმი-ზღაპარი „ჩხიკვთა ქორწილი".
