თბილისი, 25 მარტი – Sputnik. ახალგაზრდებისა და ბავშვთა უკრაინული საერთაშორისო ფესტივალი-კონკურსი „მზე ჩვენკენ არის“ (Солнце за нас) საქართველოში პირველად 2018 წლის 1-7 მაისს ჩატარდება.
ღონისძიების მიზანია — საბავშვო და ახალგაზრდული შემოქმედების აღმოჩენა, მხარდაჭერა და პოპულარიზაცია და ასევე საქართველოსა და უკრაინას შორის მეგობრული კავშირების განმტკიცება.
„თქვენ გელით საინტერესო მასტერ-კლასები, ბრიფინგები, საკონცერტო პროგრამები, ურთიერთობა პატივცემულ ჟიურის წევრებთან, ასევე დატვირთული საექსკურსიო პროგრამა საქართველოს კოლორიტულ ადგილებში და არქიტექტურის ძეგლებში. შემოგვიერთდით და ჩვენსავით შეგიყვარდებათ საქართველო, და ამას სამუდამოდ დაიმახსოვრებთ“, — ნათქვამია ორგანიზატორთა განცხადებაში.
კონკურსის ფარგლებში მონაწილეებს ხუთ სხვადასხვა ნომინაციას შესთავაზებენ. ეს არის საესტრადო და ხალხური ვოკალი (სოლო, დუეტები, ტრიო), საესტრადო და ხალხური ვოკალური კოლექტივები (შოუ-ჯგუფები, ვოკალური ანსამბლები), ვოკალურ-ინსტრუმენტული ჯგუფები, საავტორო სიმღერა და ქორეოგრაფია (ხალხური, ხალხურ-სცენიური, თანამედროვე, კლასიკური).
კონკურსის ჟიური 12-ქულიანი სისტემით შეაფასებს კონკურსანტის რეპერტუარს, შესრულების ტექნიკას, მხატვრულ დონესა და სამსახიობო ოსტატობას.
თითოეულ ასაკობრივ კატეგორიასა და ნომინაციაში საუკეთესო კონკურსანტები დაჯილდოვდებიან I, II და III პრემიის ლაურეატის წოდებით, მათ გადაეცემათ გრან-პრი და ფულადი პრიზები. ყველა მონაწილე მიიღებს დიპლომს.
2 და 3 მაისს კონკურსი ჩატარდება Tbilisi Art Hall-ში (მის.: დადიანის ქ., 26), 4 მაისს — გორში, კულტურის სახლში.
ღონისძიება ტარდება უკრაინის კულტურის სამინისტროს, უკრაინაში საქართველოს საელჩოს, საქართველოში უკრაინის საელჩოს, საქართველოს კულტურისა და სპორტის სამინისტროს, თბილისისა და გორის მერიების მხარდაჭერით.
