თბილისი, 26 თებერვალი — Sputnik. საქართველოს შრომის, ჯანმრთელობისა და სოციალური დაცვის სამინისტრო იწყებს ახალი სტანდარტების დანერგვას, რათა გაკონტროლდეს როგორც იმპორტირებული, ისე ქვეყანაში წარმოებული მედიკამენტების ხაირსხი, ნათქვამია უწყების ოფიციალურ ვებ-გვერდზე.
კერძოდ, ჯანდაცვის სამინისტრო აპირებს GMP („კარგი საწარმოო პრაქტიკა“) და GDP („კარგი დისტრიბუციის პრაქტიკა“) სტანდარტების დანერგვას.
„GMP/GDP სტანდარტების დანერგვა ქვეყნისთვის უმნიშვნელოვანესი საკითხია, რამდენადაც აღნიშნული სტანდარტები უზრუნველყოფს ქვეყანაში მიმოქცევაში არსებული ფარმაცევტული პროდუქტების მაღალ ხარისხს და საქართველოში წარმოებული მედიკამენტების ექსპორტის ზრდას", — აღნიშნულია უწყების განცხადებაში.
GMP/GDP სტანდარტების დანერგვა, რომელიც ჯანდაცვის მსოფლიო ორგანიზაციის მიერ არის შემოთავაზებული, რამდენიმე ეტაპს მოიცავს. მათ შორის პირველი ეტაპია GMP-ს ნაციონალური ინსპექტორატის ჩამოყალიბება. ინსპექტორატის შექმნის მიზნით ჯანდაცვის სამინისტრო ინსპექტორების კანდიდატებს 2018 წლის 10 მარტამდე შეარჩევს.
შერჩევის კრიტერიუმები და მოთხოვნები განსაზღვრულია ევროდირექტივის შესაბამისად (პროფესიული ცოდნა, უნარები, გამოცდილება, უცხო ენის ცოდნა). ინსპექტორატი სსიპ სამედიცინო საქმიანობის სახელმწიფო რეგულირების სააგენტოს დაექვემდებარება.
კონკურსანტებიდან სააგენტო შეარჩევს რვა კანდიდატს, რომლებიც გაივლიან სპეციალურ გადამზადებას საზღვარგარეთ. კანდიდატებს, რომლებიც წარმატებით გაივლიან მზადების კურსებს, მიენიჭებათ შესაბამისი სერტიფიკატი და ისინი განახორციელებენ ფარმაცევტული საწარმოების და სადისტრიბუციო ქსელის ინსპექტირებას, რაც წამლის ხარისხის გაუმჯობესების მნიშვნელოვან ფაქტორს წარმოადგენს, აღნიშნავენ სამინისტროში.
ინსპექტირება პირველ ეტაპზე ნებაყოფლობითი ხასიათის იქნება, 2022 წლის 1 იანვრიდან კი სავალდებულო გახდება.
GMP/GDP-ს დანერგვით საქართველო აღიარებს ევროკავშირის სტანდარტებს ფარმაცევტული პროდუქტების ხარისხის კონტროლის მიმართულებით. აღნიშნული სტანდარტების დანერგვა ხელს შეუწყობს ფარმაცევტული სექტორის გაძლიერებასა და ქვეყნის ეკონომიკურ განვითარებას.
უფრო ადრე ჯანდაცვის საპარლამენტო კომიტეტის თავმჯდომარემ აკაკი ზოიძემ განაცხადა, რომ მედიკამენტები საქართველოში არასაკმარისად მოწმდება, რადგან სამედიცინო საქმიანობის მარეგულირებელ სააგენტოს სახსრები არ ჰყოფნის.
სახელმწიფო მედიკამენტებს გარკვეული პრეპარატების შემოტანის დროს აკონტროლებს, მაგრამ მას შემდეგ, რაც ის სააფთიაქო ქსელში ხვდება, მხოლოდ ლიმიტირებული კონტროლი ხორციელდება, აღნიშნა დეპუტატმა.
