თბილისი, 25 სექტემბერი — Sputnik. ქართული დიასპორა უცხოეთში 272 გაერთიანებას ითვლის, განაცხადა საქართველოს საგარეო საქმეთა მინისტრმა მიხეილ ჯანელიძემ, რომელმაც პარლამენტის დიასპორისა და კავკასიის საკითხთა კომიტეტის წევრებს მისი უწყების მიერ დიასპორებთან და სათვისტომოებთან გაწეული სამუშაოს შესახებ ანგარიში წარუდგინა.
სამინისტროში დიასპორებთან ურთიერთობების დეპარტამენტი 2016 წლის ბოლოს, დიასპორის საკითხებში სახელმწიფო მინისტრის აპარატის გაუქმების შემდეგ შეიქმნა.
„უცხოეთში დიასპორების 272 გაერთიანება მოქმედებს, მათ შორის, საკვირაო სკოლები, ქართული სიმღერისა და ცეკვის ანსამბლები, სტუდენტური გაერთიანებები და ა.შ." — განაცხადა ჯანელიძემ.
მისი სიტყვებით, ყველა ორგანიზაციის მხრიდან ანკეტებისა და კითხვარების შევსების გზით სრული საინფორმაციო-ანალიტიკური ბაზა შეიქმნა.
საგარეო უწყების ხელმძღვანელმა აღნიშნა, რომ ბაზების შექმნასთან ერთად იქმნება „საჭიროებების კატალოგი", რომლის თანახმად, იგეგმება საკვირაო სკოლებისა და საცეკვაო ანსამბლების დახმარება.
„მომავალში ჩვენ ვგეგმავთ 50 გაერთიანების დახმარებას", — განაცხადა ჯანელიძემ.
ამასთან ერთად, მისი სიტყვებით, საქართველოს საგარეო საქმეთა სამინისტრო დიასპორებთან თანამშრომლობის გაფართოებას გეგმავს.
„ახლო პერიოდში რამდენიმე საელჩოში იგეგმება ერთი პირის დანიშვნა, რომელიც მხოლოდ დიასპორის საკითხებზე იმუშავებს", — აღნიშნა ჯანელიძემ.
აღნიშნული პირი 24-საათიან რეჟიმში დიასპორებთან კონტაქტზე იქნება იმისთვის, რათა აუცილებლობის შემთხვევაში მოახდინოს მათ პრობლემებზე რეაგირება და თბილისთან მათი კომუნიკაციის უზრუნველყოფა, დასძინა მინისტრმა.
როგორც ჯანელიძემ აღნიშნა, მიმდინარეობს ოფიციალური დიასპორების ფორმირების პროცესი, რომელიც უკვე დაწყებულია ისრაელში, იტალიასა და ესტონეთში.
ამჟამად არსებობს ისტორიული დიასპორა — ეს ის თანამემამულეები არიან, რომლებიც თავიანთ ისტორიულ სამშობლოში ცხოვრობენ (რუსეთი, ისრაელი, საბერძნეთი და სხვა), ან საქართველოდან 1990 წლამდე წავიდნენ — ასეთი მილიონზე მეტი ადამიანია. გარდა ამისა, არიან თანამედროვე ემიგრანტებიც — ისინი, ვინც 1990 წლის შემდეგ წავიდნენ — ასეთი დაახლოებით მილიონნახევარი ადამიანია.
