თბილისი, 8 ივნისი — Sputnik. საქართველოში ახალგაზრდობა დროის უმეტეს ნაწილს ინტერნეტში გართობას ახმარს და არა სწავლას, განაცხადა დემოგრაფმა ანზორ თოთაძემ პრესკონფერენციაზე.
დემოგრაფმა წარმოადგინა კვლევის შედეგები, რომელშიც საქართველოს ხუთი უმაღლესი სასწავლებლის სტუდენტები მონაწილეობდნენ. კვლევის თანახმად, ახალგაზრდა მამაკაცები დღე-ღამეში ინტერნეტზე ხარჯავენ 10 საათსა და 20 წუთს, ხოლო ახალგაზრდა ქალები — 9 საათსა და 45 წუთს.
„ადამიანები ძალიან დიდ დროს ხარჯავენ ელექტრონულ სივრცეში, მაგრამ არა იმისთვის, რომ განვითარდნენ, არამედ – რომ ითამაშონ და გაერთონ", — განაცხადა თოთაძემ.
დემოგრაფი დარწმუნებულია, რომ თუ ადამიანს დროის სწორად გამოყენება არ შეუძლია, ის ფასეულს ვერაფერს შექმნის. თოთაძემ თავისი კვლევის შედეგებს საგანგაშო უწოდა, რადგან ახალგაზრდობა გართობისთვის ძალზე დიდ დროს უთმობს ტელევიზორს, მობილურ ტელეფონსა და კომპიუტერს.
კვლევამ ასევე აჩვენა, რომ გამოკითხულთა ძირითადი ნაწილი იძინებს 01:00 ან 02:00 საათზე, ყოველი მეხუთე კი — 03:00 საათზე და უფრო გვიან.
