თბილისი, 21 მაისი – Sputnik. ლაგოდეხის რაიონის სოფელ საკობოს მოსახლეობამ სოფლიდან ლაგოდეხისკენ მიმავალი გზა 15 წუთი გადაკეტა.
გუშინ ძლიერმა ქარმა და სეტყვამ მნიშვნელოვნად დააზარალა კახეთის სოფლები. კვირას სეტყვა გამეორდა. მოსახლეობა ზარალის ანაზღაურებას ითხოვს.
„არ მოდიან. ყურადღებას არავინ გვაქცევს. იძულებული ვიყავით, გზა გადაგვეკეტა, რომ მოვიდნენ და ყურადღება მოგვაქციონ“, – განაცხადა სოფლის ერთ–ერთმა მცხოვრებმა ტელეკომპანია Rustavi2–ის ეთერში.
გზა მას შემდეგ გაათავისუფლეს, რაც ადგილზე პოლიციისა და გამგეობის თანამშრომლები მივიდნენ.
ხელისუფლება, თავის მხრივ, აცხადებს, რომ ზარალს იმათ აუნაზღაურებს, ვისაც მოსავალი დაზღვეული ჰქონდა და აგროკრედიტით სარგებლობს.
სოფლის მოსახლეობა ასევე ჩიცის, რომ ბანკებიდან კრედიტი აქვთ აღებული და ხელისუფლებას მათი გადახდის გადავადებაში დახმარებას სთხოვს.
ამინდმა პრობლემები შექმნა დასავლეთ საქართველოშიც. გუშინ, საღამოს ძლიერი წვიმის შედეგად ნაპირებიდან მდინარე რიონი გადმოვიდა, რომელმაც იმერეთის რაიონის სოფელ ჟონეთი დატბორა.
საქართველოს მეტეოროლოგიური სამსახურის მონაცემებით, უამინდობა 26 მაისამდე შენარჩუნდება.
