თბილისი, 11 მაისი — Sputnik. მუზეუმების კვირეული 16-20 მაისს გაიმართება, რომლის ფარგლებში ზოგიერთი მუზეუმი სტუმრებს უფასოდ მოემსახურება, იუწყებიან ორგანიზატორები.
ღონისძიება მუზეუმების საერთაშორისო დღეს ეძღვნება, რომელიც ყოველ წელს 18 მაისს აღინიშნება. ეს დღე 1977 წელს ICOM-ის (International Council of Museums) მე-11 გენერალურ კონფერენციაზე დაფუძნდა. 1978 წლიდან დღესასწაულის აღნიშვნა 150-ზე მეტ ქვეყანაში დაიწყეს.
ამ დღეს მუზეუმებში, ტრადიციულად ეწყობა ღია კარის დღე, გამოფენები, საგანმანათლებლო პროგრამები, სამეცნიერო კონფერენციები, ლექციები და კულტურული და სამეცნიერო-შემეცნებითი ღონისძიებები.
ყოველწლიურად მუზეუმების საერთაშორისო დღეს ახალი თემატიკა აქვს, რომელსაც სხვადასხვა ღონისძიებას უძღვნიან. 2017 წლის თემაა "მუზეუმები და სადავო ისტორიები: მუზეუმი საუბრობს უთქმელზე".
საქართველოს ეროვნული მუზეუმი უერთდება ამ კამპანიას და უკვე მე-10 წელია მუზეუმის საერთაშორისო დღეს ტრადიციულად აღნიშნავს "მუზეუმის კვირეულით".
ღონისძიების ფარგლებში 18 მაისს საქართველოს ეროვნული მუზეუმის გაერთიანებაში შემავალ ყველა მუზეუმში შესვლა თავისუფალია.
მუზეუმების ჩამონათვალი იხილეთ ოფიციალურ ვებ-გვერდზე.
მუზეუმის კვირეულის პროგრამა
16 მაისი
18:00 — მუსიკოს ნიაზ დიასამიძის ნამუშევრების გამოფენა "ქართული ანბანი", გრიშაშვილის სახელობის თბილისის ისტორიის მუზეუმი "ქარვასლა";
ლაშა ბაქრაძის საჯარო ლექცია, ჯანაშიას სახელობის საქართველოს მუზეუმი.
17 მაისი
11:00 — სამეცნიერო კონფერენცია "21-ე საუკუნის მუზეუმების გამოწვევები და მილენიუმის თაობა". საქართველოს ეროვნული მუზეუმის აუდიტორია;
17:00 საათი – ზიგა ვალიშევსკის 120 წლის იუბილესადმი მიძღვნილი გამოფენა. შ. ამირანაშვილის სახელობის ხელოვნების მუზეუმი;
18:00 საათი – გამოფენა,,დიფუზიის სივრცე" პროექტის,,თანამედროვე ხელოვნების გალერეა" ფარგლებში. ი. გრიშაშვილის სახელობის თბილისის ისტორიის მუზეუმი "ქარვასლა".
18 მაისი
14:00 საათი – ეროვნული მუზეუმის წლიური ანგარიში. ს. ჯანაშიას სახელობის საქართველოს მუზეუმი;
15:00 საათი – გამოფენა "XVIII-XX საუკუნეების ქართული კოსტიუმი და იარაღი". ს. ჯანაშიას სახელობის საქართველოს მუზეუმი;
19:30 საათი – ზაქარია ფალიაშვილის სახელობის ცენტრალური სამუსიკო სკოლა,,ნიჭიერთა ათწლედის" კონცერტი. ს. ჯანაშიას სახელობის საქართველოს მუზეუმის ეზო.
19 მაისი
14:00 საათი – გამოფენა "გერმანელი მხატვრები საქართველოში. XIX-XX საუკუნეები". სიღნაღის მუზეუმი, სიღნაღი;
16:00 საათი – ლევან ლაღიძის საჯარო ლექცია. დ. შევარდნაძის სახელობის ეროვნული გალერეა.
20 მაისი
13:00 – საგანმანათლებლო პროგრამები და შემეცნებითი თამაშები. გ. ჩიტაიას სახელობის ეთნოგრაფიული მუზეუმი.
