თბილისი, 8 მაისი — Sputnik. სეტყვამ გურჯაანის რაიონის რამდენიმე სოფელი დააზარალა.
სეტყვამ სოფელ ახაშენში, ჩუმლაყში, ველისციხეში, მუკუზანსა და გურჯაანში სავარგულები და მოსავალი დააზიანა.
"ამჟამად ინფორმაციას ვაგროვებთ. რაიონის გამგებლის ბრძანებით სპეციალური კომისიაა შექმნილი", — განაცხადა გურჯაანის რაიონის გამგეობის წარმომადგენელმა ჯემალ შარაშვილმა ტელეკომპანია Imedi-ს ეთერში.
მისი თქმით, კომისიის წარმომადგენლები ადგილზე შეისწავლიან ვითარებას, რის შემდეგაც ზარალის დათვლა დაიწყება.
ბოლო დროს ეს პირველი შემთხვევა არ არის, როდესაც სეტყვა აღმოსავლეთ საქართველოს სოფლებს აზარალებს. 7 აპრილის საღამოს ხოდაშენსა და ქისტაურში მოსულმა სეტყვამ მოსახლეობის სავარგულები და მოსავალი გაანადგურა.
ქვეყნის აღმოსავლეთ ნაწილში სეტყვას სინოპტიკოსები უახლოეს დღეებში კიდევ ვარაუდობენ.
