თბილისი, 7 მაისი — Sputnik. ძლიერმა სეტყვამ ახმეტის მუნიციპალიტეტის სოფლები ქისტაური და ხოდაშენი დააზარალა. სეტყვის შედეგად ვენახები და სახნავ-სათესი სავარგულები დაზიანდა, განაცხადა „Sputnik საქართველოსთან“ ახმეტის რაიონული ადმინისტრაციის უფროსის მოადგილე მათე ქავთარაშვილმა.
ხოდაშენის ტერიტორიულ ერთეულში შედის სოფლები — აწყური, ზემო ხოდაშენი, ხორხელი, ჩარექაული, ჩაბინაანი. ქისტაურის ტერიტორიული ერთეულის შემადგენლობაში კი — არაშენდა, ახალშენი, ახშანი, ინგეთი, კოჯორი, ოსიაური, საჭალე და ქისტაური.
„ამინდი ჯერ კიდევ არამდგრადია. ხან წვიმს, ხან გადაიღებს. სეტყვა საღამოს წამოვიდა და დაახლოებით 20 წუთი გაგრძელდა“, — განაცხადა ქავთარაშვილმა.
მისი სიტყვებით, 8 მაისის დილიდან მოხდება სეტყვის შედეგად მიყენებული ზარალის დათვლა.
