თბილისი, 27 აპრილი — Sputnik. მმართველი პარტია „ქართული ოცნება — დემოკრატიული საქართველო“ იწყებს ხელმოწერების შეგროვებას საქართველოს კონსტიტუციაში ცვლილებების ინიცირებისათვის. აღნიშნული გადაწყვეტილება საპარლამენტო უმრავლესობის დეპუტატებმა პარტიის ცენტრალურ ოფისში გამართულ შეხვედრაზე მიიღეს.
საქართველოს კანონმდებლობის თანახმად, პარლამენტში საკონსტიტუციო ცვლილებების პროექტის შეტანის შემდეგ, საკანონმდებლო ორგანო იწყებს ხელმოწერების შეგროვებას კანონპროექტზე.
იმისათვის, რომ დაიწყოს სახალხო განხილვა, ინიციატორებმა უნდა წარმოადგინონ 76 დეპუტატის ან 200 ათასი მოქალაქის ხელმოწერა.
„ქართული ოცნების“ დეპუტატის მარიამ ჯაშის განცხადებით, საპარლამენტო უმრავლესობის ფორმატში საკონსტიტუციო ცვლილებები განხილულია და იწყება ხელმოწერების შეგროვება ცვლილებების ინიცირებისათვის. ამასთან, მისი თქმით, ვენეციის კომისიისა და სახალხო განხილვის შედეგად მიღებული რეკომენდაციები მაქსიმალურად იქნება გათვალისწინებული.
როგორც დეპუტატმა ჟურნალისტებს უთხრა, დეპუტატები ხელმოწერების შეგროვებას უახლოეს ხანებში დაასრულებენ, რათა სახალხო განხილვა 5 მაისისათვის დაიწყოს.
სავარაუდოდ 76 დეპუტატის ხელმოწერა პარლამენტში 1 მაისისათვის შევა.
გასული კვირის ბოლოს სახელმწიფო საკონსტიტუციო კომისიამ საქართველოს კონსტიტუციაში ცვლილებების პროექტი 43 ხმით 8 წინააღმდეგ დაამტკიცა. კენჭისყრაში ოპოზიციურ პარტიებს მონაწილეობა არ მიუღიათ, რომელთაც პროტესტის ნიშნად დატოვეს კომისია. ცვლილებების მოწინააღმდეგეთა ხმები არასამთავრობო ორგანიზაციებსა და ექსპერტთა ნაწილს ეკუთვნოდა.
კანონპროექტი ძირითადად გულისხმობს ცვლილებებს საქართველოს პრეზიდენტისა და პარლამენტის უფლებამოსილებებში. მათ შორის დაგეგმილია პრეზიდენტის პირდაპირი წესით და პარლამენტში ერთმანდატიანი ოლქების წარმომადგენელთა არჩევის გაუქმება, პრეზიდენტის უფლებამოსილების შეკვეცა და პარლამენტის უფლებამოსილების გაზრდა.
გარდა ამისა, დაგეგმილია პრეზიდენტობისა და დეპუტატობის კანდიდატებისათვის ასაკობრივი ცენზის გაზრდა.
