თბილისი, 28 იანვარი – Sputnik. საერთაშორისო ორგანიზაცია The Economist Intelligence Unit-ის კვლევის მიხედვით, საქართველომ დემოკრატიის ინდექსში მსოფლიოს 167 ქვეყანას შორის 78-ე ადგილი დაიკავა.
ინდექსის შედგენისას კვლევის ავტორებმა გაითვალისწინეს საარჩევნო პროცესი და პლურალიზმი, მთავრობის მუშაობა, ქვეყნის პოლიტიკურ ცხოვრებაში მოსახლეობის მონაწილეობა, პოლიტიკური კულტურა და სამოქალაქო თავისუფლება.
ინდექსის შედგენისას კვლევის ავტორები ქვეყნებს ოთხ კატეგორიაში ყოფენ: სრული დემოკრატია, არასრული დემოკრატია, ჰიბრიდული რეჟიმი და ავტორიტარული რეჟიმი.
კვლევის თანახმად, საქართველოში გარდამავალი რეჟიმია. ქვეყანას ყველაზე მაღალი მაჩვენებელი საარჩევნო პროცესსა და პლურალიზმში აღმოაჩნდა — 10-დან 8,67 ქულა. ქვეყანაში მთავრობის მოღვაწეობამ და პოლიტიკურმა კულტურამ კი შემდეგი შეფასებები მიიღო — 4, 29 და 5 ქულა.
რეიტინგში სომხეთმა 120-ე ადგილი დაიკავა, აზერბაიჯანმა — 148-ე, რუსეთმა — 134-ე და თურქეთმა — 97-ე.
დემოკრატიის ინდექსის პირველ ათეულშია ნორვეგია, ისლანდია, შვედეთი, ახალი ზელანდია და დანია.
ინდექსში აშშ 21-ე ადგილზეა, გერმანია — მე-13, ხოლო დიდი ბრიტანეთი მე-16 ადგილს იკავებს.