თბილისი, 27 იანვარი — Sputnik. შს მინისტრი გიორგი მღებრიშვილი საქართველოში ავსტრიის ელჩს არად ბენკოს შეხვდა, ნათქვამია უწყების ვებ-გვერდზე გავრცელებულ ინფორმაციაში.
შეხვედრაზე მხარეებმა ორი ქვეყნის კრიმინალური პოლიციის სამსახურებს შორის არსებული მჭიდრო და ნაყოფიერი თანამშრომლობის შესახებ ისაუბრეს.
როგორც გიორგი მღებრიშვილმა აღნიშნა, საქართველოს შინაგან საქმეთა სამინისტროს ავსტრიასთან საპოლიციო სფეროში მნიშვნელოვანი საერთაშორისო ხელშეკრულებები აქვს გაფორმებული, რომელთა საფუძველზეც ეფექტური თანამშრომლობა ხორციელდება.
შეხვედრაზე ასევე ხაზი გაესვა იმ ფაქტს, რომ ავსტრია ერთ-ერთი პირველი სახელმწიფოა, რომელმაც საქართველო უსაფრთხო ქვეყნებს შორის დაასახელა.
შს მინისტრმა ავსტრიის ელჩს საქართველოს შს სამინისტროში განხორციელებული და დაგეგმილი პროექტები გააცნო, მათ შორის, მაღალტექნოლოგიური და მულტიფუნქციური ერთობლივი ოპერაციების ცენტრი, რომელიც უწყების ყველა სტრუქტურულ დანაყოფს აერთიანებს.
შეხვედრაზე გიორგი მღებრიშვილმა და არად ბენკომ მიმდინარე წლის პირველ ნახევარში ავსტრიის შინაგან საქმეთა მინისტრის, ვოლფგანგ სობოტკას საქართველოში ვიზიტის დეტალები და ორი ქვეყნის სამართალდამცავ უწყებებს შორის თანამშრომლობის გაღრმავების სამომავლო გეგმები განიხილეს.
შეხვედრის დასასრულს გიორგი მღებრიშვილმა ავსტრიულ მხარეს მტკიცე მხარდაჭერისა და საქართველოს ვიზალიბერალიზაციის პროცესში შეტანილი წვლილისათვის მადლობა გადაუხადა.
