თბილისი, 29 დეკემბერი– Sputnik. უკრაინის პოლიციამ საქართველოს სამი მოქალაქე საერთაშორისო აეროპორტ „ხარკოვში“ მესაზღვრეების მოსყიდვის ბრალდებით დააკავა, ნათქვამია უკრაინის სახელმწიფო სასაზღვრო სამსახურის განცხადებაში.
დაკავებულთაგან საქართველოს ერთ მოქალაქეს აკრძალული ჰქონდა უკრაინის ტერიტორიაზე შესვლა ქვეყნის კანონმდებლობის დარღვევის გამო, ხოლო ორმა მათგანმა ქვეყანაში ყოფნის დასაშვებ ვადას გადააჭარბა.
საქართველოს მოქალაქეები საპასპორტო კონტროლის გავლის დროს დააკავეს, როდესაც ისინი ხარკოვიდან ქუთაისში გადმოფრენას ცდილობდნენ. მათ მესაზღვრეების მოსყიდვის მიზნით საკუთარ პასპორტებში 100 და 50 აშშ დოლარის კუპიურები ჩადეს.
სისხლის სამართლის საქმე აღძრულია უკრაინის სსკ-ის მუხლით „თანამდებობის პირისთვის უკანონო სარგებლის შეთავაზება, დაპირება ან წარდგენა“, რაც ისჯება ჯარიმით 500-დან 750-მდე მინიმალური შემოსავლის ოდენობით, ან ორიდან ოთხ წლამდე თავისუფლების შეზღუდვით, ან იმავე ვადით თავისუფლების აღკვეთით.
