თბილისი, 28 დეკემბერი – Sputnik. საქართველოს შეიარაღებული ძალების გენშტაბის უფროსმა ვლადიმერ ჩაჩიბაიამ დასავლეთ სარდლობის ქვედანაყოფების ხელმძღვანელებს თავდაცვის სამინისტროში მიმდინარე რეფორმების მიმდინარეობა გააცნო, იუწყება თავდაცვის სამინისტროს ორეს-სამსახური.
უწყებაში მოსალოდნელი რეორგანიზაცია და კადრების ოპტიმიზაცია მინისტრმა ლევან იზორიამ ჯერ კიდევ ნოემბრის თვეში, 100-დღიანი მუშაობის შეჯამებისას დააანონსა. რეორგანიზაციის ფარგლებში უკვე გათავისუფლდა სამხედრო პოლიციის აღმოსავლეთ ბატალიონის 77 თანამშრომელი.
„ჩვენ პირად შემადგენლობას ვესაუბრეთ და მათ ჩვენი სამომავლო ხედვები და გეგმები გავაცანით. მე შეხვედრა გავმართე ასევე ქვედანაყოფის ხელმძღვანელობასთან. მოხარული ვარ მათი მაღალი მოტივაციით და იმით, რომ ჩვენი სამხედროები, დასავლეთ სარდლობა, ჩვენს გვერდით დგას — როგორც ჯარისკაცები, ისე სერჟანტები და ოფიცერთა შემადგენლობები“, — განაცხადა ვლადიმერ ჩაჩიბაიამ.
II მსუბუქ ქვეით ბრიგადასა და ეროვნული გვარდიის მე-10 კადრირებულ ბრიგადასთან შეხვედრისას ჩაჩიბაიამ აღნიშნა, რომ მიუხედავად კადრების ოპტიმიზაციის მტკივნეული პროცესისა, რეფორმის მიზანი ქვეყნის თავდაცვისუნარიანობის ამაღლებაა.
საქართველოს შეიარაღებული ძალების გენშტაბის უფროსი ხონში II საარტილერიო ბრიგადის პირად შემადგენლობას შეხვდა.
ჩაჩიბაია ასევე შეეხო სამხედრო პოლიციაში გათავისუფლების თემას და აღნიშნა, რომეს საკითხი მასშტაბური ცვლილებების ნაწილს წარმოადგენს, რომელიც ქვედანაყოფებშია დაგეგმილი.
სამშაბათს გენშტაბის უფროსმა ანალოგიური შეხვედრა ბათუმსა და ქუთაისში დისლოცირებულ სამხედროებთან გამართა.
