თბილისი, 4 დეკემბერი— Sputnik. ბონში კონვერსიის საერთაშორისო ცენტრის (ВІСС) მიერ შედგენილ მილიტარიზაციის გლობალურ ინდექსში საქართველომ 48-ე ადგილი დაიკავა.
2015 წელს საქართველო 57-ე ადგილს იკავებდა.
რეიტინგი 152 სახელმწიფოს მოიცავს და ბოლო ხელმისაწვდომ ინფორმაციას ეყრდნობა. უმეტეს შემთხვევებში, გამოიყენება 2015 წლის მონაცემები. გლობალური მილიტარიზაციის ინდექსი შედგენილია ზოგადად საზოგადოებისადმი სახელმწიფოს სამხედრო აპარატის შედარებითი წონადობისა და მნიშვნელობის საფუძველზე.
ტოპ-ათეულში საქართველოს უახლოესი მეზობელი ქვეყნები შევიდნენ — სომხეთმა მესამე ადგილი დაიკავა, რუსეთმა მეხუთე, აზერბაიჯანმა კი მეცხრე. (თურქეთი მეოცე ადგილზეა).
რეიტინგის ლიდერი ისრაელი გახდა, რომელიც რეიტინგში პირველ ადგილზეა. ათეულში ასევე მოხვდნენ ისეთი ქვეყნები, როგორიცაა სინგაპური (მეორე ადგილი), იორდანია (მეოთხე ადგილი), სამხრეთ კორეა (მეექვსე ადგილი), კვიპროსი (მეშვიდე ადგილი), საბერძნეთი (მერევე ადგილი) და ბრუნეი (მეათე ადგილი).
"ახლო აღმოსავლეთში მიმდინარე ხანგრძლივი კონფლიქტების ფონზე ქვეყნების უმრავლესობაში მილიტარიზაციის დონე მაღალი რჩება. ისრაელი ისევ რეიტინგის სათავეში იმყოფება, იორდანია კი მეოთხე პოზიციაზე. უახლოეს წლებში გამოჩნდება, როგორ იმოქმედებს 2014 წლის შუა პერიოდიდან დაწყებული ნავთობის ფასების მკვეთრი ვარდნა სპარსეთის ყურის ქვეყნების მილიტარიზაციაზე და მათ მიერ იარაღის შესყიდვის მოცულობაზე", — აღნიშნულია კვლევაში.
კვლევაში ასევე აღნიშნულია, რომ იმ დროს, როდესაც 2015 წლისთვის აღმოსავლეთ ევროპის ქვეყნებმა მილიტარიზაციის შესამჩნევი ზრდა აჩვენეს, დასავლეთ ევროპის ქვეყნების უმრავლესობაში მსგავსი ტენდენცია არ შეინიშნება.
რეიტინგის ბოლო პოზიციები უკავიათ გამბიას (148-ე ადგილი), ლიბერიას (149-ე ადგილი), პაპუა-ახალ გვინეას (150-ე ადგილი), ისლანდიას (151-ე ადგილი) და სვაზილენდს (152-ე ადგილი).
