თბილისი, 12 ნოემბერი — Sputnik. ავღანეთში მდებარე ამერიკული ავიაბაზა „ბაგრამის“ სიახლოვეს მომხდარი აფეთქებისას არცერთი ქართველი სამხედრო მოსამსახურე არ დაშავებულა, იუწყება საქართველოს თავდაცვის სამინისტროს პრესსამსახური.
აფეთქება დღეს დილით, 5 საათზე მოხდა ბაზრის ტერიტორიაზე, სადაც ადგილობრივი მოსახლეობა ავღანურ ხელნაკეთ ნივთებსა და სხვადასხვა საქონელს ყიდის.
ტერაქტზე პასუხისმგებლობა უკვე აიღო რადიკალურმა დაჯგუფება „თალიბანმა“ და აღნიშნა, რომ ეს შეტევა თვითმკვლელმა მებრძოლმა განახორციელა.
„ასაფეთქებელი მოწყობილობა დილის 5 საათზე ამოქმედდა. დაიღუპა 4 და სხეულის დაზიანებები მიიღო მტკიცე მხარდაჭერის მისიის კოალიციური ძალების 14-მა ამერიკელმა სამხედრო მოსამსახურემ. დაღუპულთა და დაშავებულთა შორის არ არიან საქართველოს შეიარაღებული ძალების სამხედრო მოსამსახურეები“, — ნათქვამია თავდაცვის სამინისტროს მიერ გავრცელებულ განცხადებაში.
უწყება აღნიშნავს, რომ ბაზა ბაგრამზე უსაფრთხოების გაძლიერებული ზომებია მიღებული.
