თბილისი, 7 ნოემბერი — Sputnik. მომავალ წელს გუდაურში ხელოვნური ტბა გაჩნდება, აცნობეს საინფორმაციო სააგენტო „ნოვოსტი-გრუზიას“ მთის კურორტების განვითარების კომპანიაში.
ხელოვნური ტბა გუდაურში სეზონის უფრო ადრე გახსნას შეუწყობს ხელს, რადგან ტბა ხელოვნური გათოვლიანებისთვის არის საჭირო. ხელოვნური გათოვლიანება კი ბუნებრივი კლიმატური პირობებისგან დამოუკიდებლობის საშუალებას იძლევა.
ტენდერი ხელოვნური ტბის მოწყობასთან დაკავშირებით ზამთარში გამოცხადდება, ხოლო სამუშაოები გაზაფხულიდან დაიწყება. პროექტისთვის სახელმწიფო ბიუჯეტიდან 20 მილიონი ლარი გამოიყოფა.
გუდაური საქართველოში ერთ-ერთი ყველაზე თანამედროვე და განვითარებული ზამთრის კურორტია. ის დიდი პოპულარობით სარგებლობს ტურისტებს შორის.
გუდაური ზღვის დონიდან 2200 მეტრ სიმაღლეზე მდებარეობს. ბოლო ზამთრის სეზონი გუდაურში, პირველად 15 წლის განმავლობაში, ჩვეულებრივზე ადრე გაიხსნა — 13 დეკემბერს, ეს ხელოვნური გათოვლიანების წყალობით მოხერხდა.
ამიერიდან კურორტი კლიმატურ პირობებზე დამოკიდებული აღარ იქნება. სამთო-სათხილამურო სეზონი, ჩვეულებრივ, მაისამდე გრძელდება. 2016 წელს კიდევ ერთი სიახლეა — მოთხილამურე პატრული. საბაგირო გზის გახსნიდან დახურვამდე დამსვენებლების უსაფრთხოებაზე 14 საპატრულო ინსპექტორი ზრუნავს. გუდაურში ასევე იმართება ჰელისკი. ეს სამთო-სათხილამურო სპორტის სახეობაა, რომელიც სასრიალო ბილიკებისგან შორს მდებარე ველური მთების ფერდობებზე გაუკვალავ თოვლში სრიალს გულისხმობს და ამწე საშუალებად ვერტმფრენს იყენებს. აღსანიშნავია, რომ ევროპის მრავალ კურორტზე ეს სახეობა აკრძალულია.
