თბილისი, 1 ნოემბერი — Sputnik. საქართველოს ნაკრების მთავარი მეკარე გიორგი ლორია რუსეთის ჩემპიონატის ბოლო ოთხი მატჩია, კარის „მშრალად შენახვას“ ვერ ახერხებს.
რუსეთის პრემიერ-ლიგის ბოლო, მე-12 ტურში „კრილია“ „ორენბურგის“ წინააღმდეგ გასვლით მატჩში დამარცხდა ანგარიშით 0:1. მატჩის განმავლობაში ქართველმა მეკარემ თავისი კლუბის კარი არაერთხელ იხსნა, მაგრამ თამაშის 62-ე წუთზე უძლური აღმოჩნდა. სტუმრების სამმა მცველმა „ორენბურგელი“ არტემ დელკინისთვის ხელის შეშლა ვერ შეძლო და თავდამსხმელმა ლორიას კარი აიღო — გამარჯვება მასპინძლებს დარჩათ.
„ორენბურგთან“ დამარცხებისთანავე გადააყენეს „კრილია სოვეტოვის“ მთავარი მწვრთნელი ფრანკ ვერკაუტერენი, რომელიც გუნდში 2014 წლიდან მუშაობდა. ვინ შეცვლის ბელგიელ სპეციალისტს, ჯერჯერობით უცნობია.
რუსეთის ჩემპიონატის მე-12 ტურის შემდეგ „კრილიას“ მხოლოდ შვიდი ქულა აქვს და სატურნირო ცხრილის ბოლო ადგილზეა.
შემდეგ თამაშს სამარის კლუბი „ურალის“ წინააღმდეგ საკუთარ მოედანზე გამართავს. „ურალში“ თამაშობს ლორიას პარტნიორი საქართველოს ეროვნულ ნაკრებში — გიორგი ჭანტურია.
