თბილისი, 6 ოქტომბერი — Sputnik. ჩრდილოატლანტიკური ალიანსი შეშფოთებულია პარლამენტის ოპოზიციონერი დეპუტატის გივი თარგამაძის მანქანის აფეთქებით, აღნიშნა ნატოს გენერალური მდივნის სპეციალურმა წარმომადგენელმა სამხრეთ კავკასიასა და ცენტრალურ აზიაში ჯეიმს აპატურაიმ.
„ნატო შეშფოთებულია ძალადობის ფაქტებით, რომლებიც წინასაარჩევნო პროცესის დროს მოხდა, სულ ცოტა ხნის წინ კანდიდატის მანქანა აფეთქდა. საარჩევნო კამპანია უნდა მიმდინარეობდეს მშვიდობიან გარემოში, დემოკრატიის ყველაზე მაღალი პრინციპების შესაბამისად“, — დაწერა აპატურაიმ საკუთარ ფეისბუქ-გვერდზე.
პრემიერ-მინისტრ გიორგი კვირიკაშვილის განცხადებით, თარგამაძის მანქანის აფეთქების დამგეგმავები და ამფეთქებლები კანონის მთელი სიმკაცრით დაისჯებიან. მისი თქმით, გამოძიება უკვე დაწყებულია და დამნაშავეთა დასაკავებლად ყველა აუცილებელი ღონისძიება ტარდება.
