თბილისი, 4 ოქტომბერი — Sputnik. დეპუტატ გივი თარგამაძის ავტომანქანის აფეთქების ფაქტზე, საქართველოს შინაგან საქმეთა სამინიტრომ სისხლის სამართლის საქმე აღძრა „დამამძიმებელ გარემოებებში განზრახ მკვლელობის მცდელობის“ მუხლით, ამის შესახებ ჟურნალისტებს შსს-ს მინისტრის მოადგილემ ბესიკ ამირანაშვილმა განუცხადა.
დეპუტატ გივი თარგამაძის ავტომანქანა სამშაბათს საღამოს კოლმეურნეობის მოედანზე ააფეთქეს. ამ დროს ავტომანქანაში გივი თარგამაძე და მისი მძღოლი იმყოფებოდნენ, რომლებიც მსუბუქად დაშავდნენ. წინასწარი მონაცემებით დაჭრილია 4 ადამიანი, რომლებიც საავადმყოფოში არიან გადაყვანილი. მათგან ერთის მდგომარეობა საკმაოდ მძიმეა. აფეთქების შედეგად ასევე დაზიანდა ახლოს მდგარი ავტომანქანები და მაღაზიების ვიტრინები.
„შემთხვევის ადგილზე ექსპერტ-კრიმინალისტთა ჯგუფი მუშაობს. მიმდინარეობს ყველა პირველადი საგამოძიებო მოქმედება და ჩვენ შევეცდებით უახლოეს მომავალში დავადგინოთ ჭეშმარიტება ამ საქმეში. შსს ყველაფერს გააკეთებს ამისათვის“, — თქვა ამირანაშვილმა.
ამირანაშვილმა თავი შეიკავა დასკვნებისაგან სად იყო დამონტაჟებული ასაფეთქებელი მოწყობილობა და რა ტიპის იყო იგი.
საქართველოს კანონმდებლობით აღნიშნული დანაშაული 11-დან 14 წლამდე თავისუფლების აღკვეთით ისჯება.
