თბილისი, 17 აგვისტო — Sputnik. ოპოზიციური პარტია „თავისუფალი დემოკრატების“ წარმომადგენლებმა გლდანის რაიონში, ე.წ. პატარა ტბის ტერიტორიაზე ნაგავი შეაგროვეს და მისი თბილისის მერის დავით ნარმანიასთვის ჩუქება გადაწყვიტეს, მაგრამ დედაქალაქის ადმინისტრაციამ „საჩუქარი“ არ მიიღო.
ტბის ტერიტორიის გაწმენდის აქცია ირაკლი ალასანიას პარტიის ახალგაზრდულმა ფრთამ ჩაატარა.
ახალგაზრდებმა „საჩუქარი“ დანაგვიანებული ტერიტორიის ფოტოებთან ერთად ყუთში მოათავსეს, რათა მერისთვის მისი მოვალეობები შეეხსენებინათ, აღნიშნულია პარტიის „ფეისბუქის“ გვერდზე.
„ასეც ხდება, რომ როდესაც მერია და შესაბამისი სამსახურები არ მიდიან ნაგავსაყრელთან, ნაგავი მოდის მერიასთან. საჩუქარს პირადად თბილისის მერს სწრაფი მიწოდების სამსახურით გავუგზავნით“, — განაცხადა პარტიის გლდანის მაჟორიტარობის კანდიდატმა ამირან გიგუაშვილმა.
„ეს ტერიტორია პერმანენტულად სუფთავდება. მინდა აღვნიშნო, რომ ოპოზიციის მოქმედება გამოწვეულია მოქალაქეების უკანონო ქმედებებით, რომლებიც, იმის ნაცვლად, რომ ნარჩენები ნაგავსაყრელზე გადაყარონ, ამ ტერიტორიაზე ყრიან და კანონს არღვევენ“, — განაცხადა კომპანია „თბილსერვისის“ დირექტორმა ლევან ჯღარკავამ საზოგადოებრივი მაუწყებლის პირველ არხზე.
ნაგვის არასათანადო ადგილზე გადაყრისთვის ქართული კანონმდებლობა 50 ლარის ჯარიმას ითვალისწინებს.
