თბილისი, 2 აგვისტო — Sputnik. 2 აგვისტოს მიხაილ ვრუბელის სახელობის სახვითი ხელოვნების ომსკის საოლქო მუზეუმში განთქმული ქართველი ფერმწერის ნიკო ფიროსმანის ტილოების გამოფენა გაიხსნა.
ფიროსმანის სურათების ექსპოზიცია ომსკის ოლქში მოსკოვის დღეების ფარგლებში ტარდება და ქალაქის 300 წლისთავს ეძღვნება.
გამოფენაზე წარმოდგენილი ცხრამეტი ნამუშევარი მოსკოვის თანამედროვე ხელოვნების მუზეუმის კოლექციის ნაწილია. ყველა ტილო შექმნილია ფიროსმანის მიერ 1910-იან წლებში, მისი შემოქმედების ყველაზე ნაყოფიერ პერიოდში.
ექსპოზიციაზე წარმოდგენილია პრიმიტივისტის სურათები ქართული სუფრის, აღდგომის, ცხოველების თემატიკით, ასევე პირველი მსოფლიო ომის თემაზე.
მდინარე ირტიშზე გაშენებულ ქალაქში ფიროსმანის შემოქმედება პირველად არის გამოფენილი.
„ექსპოზიციაზე წარმოდგენილია უნიკალური ნამუშევარი – დუქნის აბრა, რომლის მეპატრონე ვინმე სოზაშვილი იყო – Компания заходите! საინტერესოა თვით სოზაშვილის პორტრეტიც, რომელსაც მისასალმებელი ჟესტით ღვინის ყანწი აუწევია. ფიროსმანის ყველაზე ხშირი და საყვარელი მოტივი იყო ქართული სუფრის სცენები“, — წერია მუზეუმის საიტზე.
როგორც ცნობაშია აღნიშნული, ნიკო ფიროსმანის კეთილი და გულახდილი ხელოვნება იპყრობს თავისი უშუალოობით, მხატვრული თვითმყოფადობით და სიწმინდით.
„როგორც მხატვარსა და შემოქმედს, მას დაბადებიდან გამოჰყვა ჰარმონიის აბსოლუტური გრძნობა“, — ნათქვამია საიტზე.
ქართველი ფერმწერის ტილოების გამოფენა ვრუბელის სახელობის სახვითი ხელოვნების მუზეუმში 28 აგვისტომდე გაგრძელდება.
ნიკო ფიროსმანი (1862-1918) – XX საუკუნის გამოჩენილი ქართველი მხატვარი ტრაგიკული ბედით. ცხოვრობდა და გარდაიცვალა სიღარიბეში. გარდაცვალებიდან დიდი ხნის შემდეგ კი მსოფლიომ აღიარა როგორც უდიდესი მხატვარი. მხატვრის სურათების უმრავლესობა ინახება თბილისში, საქართველოს ხელოვნების სახელმწიფო მუზეუმში.
