თბილისი, 30 ივლისი – Sputnik. თბილისის შოთა რუსთაველის სახელობის საერთაშორისო აეროპორტში მზის ენერგიის გამომუშავების სისტემა ამუშავდა, აღნიშნულია საქართველოს ეკონომიკისა და მდგრადი განვითარების სამინისტროს პრეს–სამსახურის განცხადებაში.
ტერმინალს ელექტროენერგიით ექვსი პატარა და 11 დიდი მზის პანელი უზრუნველყოფს. მზის პანელების დამონტაჟების სამუშაოები ამა წლის მარტის ბოლოს დაიწყო.
პროექტი, რომელიც სამხრეთ კავკასიაში პირველია, მიზნად ისახავს სუფთა და განახლებადი ენერგიის პოპულარიზაციასა და განვითარებას საქართველოში. ის იაპონიის მთავრობის ფინანსური მხარდაჭერით განხორციელდა.
თბილისის საერთაშორისო აეროპორტი 2005 წლის 1 ნოემბერს 22 წლის ვადით TAV Urban Georgia-ს მმართველობაში გადავიდა. თბილისის საერთაშორისო აეროპორტის მშენებლობაში, რომლის ფართობიც 25 ათასი კვადრატული მეტრია, 71,5 მლნ აშშ დოლარის ინვესტიცია ჩაიდო.
ენერგიის ალტერნატიულ წყაროებზე გადასვლის ტენდენცია მთელ მსოფლიოში შეინიშნება.
საქართველოს ენერგეტიკის სამინისტრო ამ მხრივ ბოლო წლებში აქტიურად მუშაობს. კერძოდ, საქართველოში ქარის ენერგიაზე მომუშავე სადგური „ქართლის“ მშენებლობა მიმდინარეობს. გარდაბნის რაიონში მზის ელექტროსადგურის აშენება იგეგმება.
რაც შეეხება მზის პანელებს, გათბობისთვის მზის სისტემები პირველად საქართველოში თუშეთში 2010 წელს გამოიყენეს. ფერმერებს ჰელიოსისტემები ჩეხურმა სააგენტომ გადასცა.
