თბილისი, 26 ივლისი – Sputnik. საქართველოს პროკურატურამ საკონსტიტუციო სასამართლოს თავმჯდომარე გიორგი პაპუაშვილის მიერ მოსამართლეთა დაშანტაჟების შესახებ გაკეთებული განცხადების საფუძველზე სისხლის სამართლის საქმე აღძრა.
პაპუაშვილმა განაცხადა, რომ საკონსტიტუციო სასამართლოს მოსამართლეების მისამართით მიზანმიმართული ზეწოლა მიმდინარეობს, რომლის მიზანიც მიმდინარე სასამართლო პროცესებთან დაკავშირებით მოსამართლეთა გადაწყვეტილებებზე ზეგავლენის მოპოვებაა. ამ მიზნის მისაღწევად, პაპუაშვილის სიტყვებით, ისინი მოსამართლეებს პირადი ცხოვრების შემცველი ინფორმაციების გასაჯაროებით აშანტაჟებენ.
სისხლის სამართლის საქმე პირადი ცხოვრების საიდუმლოს უკანონოდ მოპოვების და გამოყენების შესაძლო ფაქტებზე სსსკ-ის 364-ე მუხლის II ნაწილითა და 1571 მუხლის I ნაწილით აღიძრა.
საკონსტიტუციო სასამართლოს თავმჯდომარის განცხადების შემდეგ პროკურატურამ პაპუაშვილის მოსმენისა და მისთვის სასურველ დროს ჩვენების მისაცემად უწყებაში გამოცხადების შესახებ მზადყოფნა გამოთქვა. მოგვიანებით პაპუაშვილი აჭარის პროკურატურაშიც დაიბარეს.
გიორგი მარგველაშვილთან შეხვედრის შემდეგ საკონსტიტუციო სასამართლოს მოსამართლემ უარი განაცხადა პროკურატურაში მისვლაზე და ამასთან, მზადყოფნა გამოტქვა მთავარ პროკურორ ირაკლი შოთაძესთან შეხვედრაზე. აღნიშნული გადაწყვეტილება პაპუაშვილმა ახსნა იმით, რომ მან ადრეც გააკეთა განცხადება მოსამართლეთა მისამართით ზეწოლის მცდელობის ფაქტებზე, თუმცა საგამოძიებო ორგანოებს სისხლის სამართლის საქმე არ აღუძრავთ.
მთავარი პროკურატურის მიერ ორშაბათს გავრცელებული ინფორმაციით, მთავარი პროკურორი ირაკლი შოთაზე პირადად შეხვდება პაპუაშვილს და მოუსმენს მას.
