თბილისი, 12 ივლისი — Sputnik. ცნობილი ქართველი ოპერის მომღერლის, პედაგოგისა და მსახიობის თენგიზ მუშკუდიანის სახელობის ვარსკვლავის გახსნა ზაქარია ფალიაშვილის სახელობის ოპერისა და ბალეტის თბილისის სახელმწიფო თეატრის წინ 14 ივლისს გაიმართება.
ვარსკვლავის გახსნის ცერემონიის წინ 19 საათზე თეატრში საზეიმო გალა-კონცერტი გაიმართება.
როგორც თეატრში იუწყებიან, სცენაზე მუშკუდიანის მოსწავლები და მოწვეული სოლისტები იმღერებენ. მათ შორის არიან მომღერლები თეიმურაზ გუგუშვილი, ელდარ გეწაძე, ლიანა კალმახელიძე, ალექსანდრე ხომერიკი და სხვები.
საღამო ჩატარდება ოპერის თეატრის ორკესტრის მუსიკალური გაფორმებით დირიჟორების ზაზა აზმაიფარაშვილის, რევაზ ტაკიძის და გიორგი ჭიჭინაძის ხელმძღვანელობით.
თენგიზ ვარლამის ძე მუშკუდიანი 1927 წელს თბილიში დაიბადა. 1954 წელს დაამთავრა ვანო სარაჯიშვილის სახელობის თბილისის სახელმწიფო კონსერვატორია, იმავე წლიდან იყო ზ. ფალიაშვილის სახელობის თბილისის ოპერისა და ბალეტის თეატრის წამყვანი სოლისტი და ასრულებდა ბანის პარტიებს.
თენგიზ მუშკუდიანის რეპერტუარში იყო ბორის და პიმენის პარტიები (მუსორგსკის "ბორის გოდუნოვი"), მეფისტოფელის(გუნოს "ფაუსტი"), დონ ჯოვანის(მოცარტის "დონ ჯოვანი") და მრავალი სხვა.
1960-61 წელს მუშკუდიანი გადიოდა სტაჟირებას დიდ თეატრში. 1978 წლიდან ასწავლიდა თბილისის კონსერვატორიაში. 1964 წლიდან საქართველოს სახალხო არტისტი.
თენგიზ მუშკუდიანი გადაღებულია კინოშიც, ორ კინოსურათში-"აბეზარა" (1956) და "დიდოსტატის მარჯვენა"(1969-1970).
