თბილისი, 29 ივნისი — Sputnik. საქართველოს გარემოს დაცვისა და ბუნებრივი რესურსების სამინისტრო მსოფლიო ჯანდაცვის ორგანიზაციისგან იმ მონაცემების დაზუსტებასა და განმარტებას მოითხოვს, რომლებიც საერთაშორისო ენერგეტიკული სააგენტოს (IEA) კვლევაშია გამოყენებული.
IEA-ს კვლევის თანახმად, საქართველო იმ ქვეყნებს შორის ლიდერობს, სადაც ჰაერის დაბინძურების დონე სიცოცხლისთვის საფრთხეს ქმნის. გამოკითხვის შედეგებმა ქართულ საზოგადოებაში აჟიოტაჟი გამოიწვია.
„უნდა აღინიშნოს, რომ საერთაშორისო პრაქტიკაში არ გამოიყენება მეთოდოლოგიები, რომლებიც ერთმნიშვნელოვნად დააკავშირებდა ატმოსფერული ჰაერის ხარისხს სიკვდილიანობასთან სხვა ფაქტორებისაგან (მაგ. შენობების შიგნით ჰაერის ხარისხი, მწეველების რაოდენობა) მოწყვეტით”, — აღნიშნულია გარემოს დაცვის სამინისტროს განცხადებაში.
სამინისტროში მიიჩნევენ, რომ მონაცემები, რომლებიც ამტკიცებს, რომ საქართველოს ჰაერის დაბინძურების მხრივ ყველაზე მაღალი მაჩვენებელი აქვს, დეტალურად უნდა იქნას შესწავლილი.
უწყებაში ასევე აღნიშნავენ, რომ გარემოს დაცვის სფეროში გატარებული მრავალი რეფორმის მიუხედავად, ჯერ კიდევ არ არსებობს ერთიანი საინფორმაციო სისტემა, რომელიც უზრუნველყოფდა გარემოს ჯანმრთელობის მდგომარეობის ამსახველი ინფორმაციის სათანადო მართვასა და მსგავსი დასკვნების გაკეთების საშუალებას.
განცხადებაში ასევე აღნიშნულია, რომ გარემოს ეროვნული სააგენტო გარკვეული პერიოდულობით ატარებს ინდიკატორულ გაზომვებს ატმოსფერულ ჰაერში აზოტის და გოგირდის დიოქსიდების, ოზონისა და ბენზოლის შემცველობის დადგენის მიზნით. მიღებული შედეგების შედარება ევროპულ ნორმებთან არც ერთ შემთხვევაში არ გვაძლევს მაღალი გადახრის სურათს.
მიზეზთა შორის, თუ რატომაა საქართველოში ჰაერი ასეთი დაბინძურებული, დასახელებულია გაუმართავი ტრანსპორტი და უხარისხო საწვავი.
მაღალი საზოგადოებრივი ინტერესის გათვალისწინებით, გარემოსა და ბუნებრივი რესურსების დაცვის სამინისტრო ანგარიშში მოცემული მონაცემების შესწავლის მიმდინარეობასთან დაკავშირებით პერიოდულად გამოაქვეყნებს შედეგებს.
