თბილისი, 22 ივნისი — Sputnik. საქართველოს კულტურისა და ძეგლთა დაცვის სამინისტრო აცხადებს ღია კონკურსს ქ.ნიუ-იორკში, გაეროს შტაბ-ბინაში, გაერო-ს ხელოვნების კოლექციაში განსათავსებელი ქანდაკების ესკიზის საუკეთესო პროექტის გამოსავლენად.
კონკურსის პირობების თანახმად, სახვითი ხელოვნების ნიმუშის (ქანდაკების) ესკიზი უნდა იყოს კამერული ხასიათის კომპოზიცია. კომპოზიციის შერჩევისას გათვალისწინებული უნდა იქნას გაეროს შტაბ-ბინის ფოიეში განთავსებული სხვადასხვა ქვეყნის ექსპონატების ზომა და მასშტაბი. საკონკურსო ესკიზი პროექტის გადაწყვეტილი უნდა იყოს თავისუფალი შესრულების სტილით, თემატურად დაკავშირებული უნდა იყოს საქართველოს ისტორიასთან და კულტურულ მემკვიდრეობასთან (თემები: ქართული ანბანი, ოქროს საწმისი და სხვა).
კონკურსში მონაწილეები თავისუფალნი არიან სკულპტურული კომპოზიციის განსახორციელებლად გამოსაყენებელი მასალების შერჩევაში, პროექტის განხორციელების საერთო სახარჯთაღრიცხვო ღირებულება წარმოდგენილ უნდა იქნას სამინისტროში და არ უნდა აღემატებოდეს – 25 000 (ოცდახუთი ათასი) ლარს;
კონკურსში მონაწილეობის მიღება შეუძლიათ: პროფესიონალ (დიპლომირებული) მოქანდაკეებს, არქიტექტორებს, მხატვრებს, შესაძლებელია ჯგუფური პროექტის წარმოდგენაც.
კონკურსი ტარდება ერთ ტურად.
კონკურსში გამარჯვებული პროექტის ავტორისათვის დაწესებულია ერთჯერადი ფულადი პრემია 5 000 ლარის ოდენობით;
პროექტების წარმოდგენის ბოლო ვადაა 2016 წლის 8 ივლისი 17:30 სთ. საკონკურსოდ წარმოდგენილი პროექტების განხილვა შედგება 2016 წლის 12 ივლისს.
კონკურსის შედეგები გასაჯაროვდება 2016 წლის 14 ივლისს. პროექტი უნდა განხორციელდეს 2016 წლის 1 სექტემბრამდე;
პროექტი და ყველა თანდართული მასალა წარმოდგენილი უნდა იყოს მისამართზე: ქ. თბილისი, სანაპიროს ქ. 4, საქართველოს კულტურისა და ძეგლთა დაცვის სამინისტრო;
