თბილისი, 6 ივნისი— Sputnik. 2015 წლიდან საქართველოს შრომის ბაზარზე რუსული ენა ისევ მოთხოვნადი გახდა, განუცხადა Sputnik-ს შრომითი მოწყობის საიტის HR.ge კომერციულმა დირექტორმა ეთერ ლესჩინსკაია.
სპეციალისტების სიტყვებით, საქართველოში რუსული ენის შესწავლაზე მოთხოვნა დღითიდღე იზრდება, ქართული ახალგაზრდობის უმრავლესობას კი ელემენტარული ცოდნაც კი არ გააჩნია.
„მოთხოვნა გაიზარდა, ეს ვაკანსიებსაც ეტყობა. ოთხიდან მინიმუმ ერთ პოზიციაზე აუცილებლად ითხოვენ რუსულ ენის ცოდნას და თანაც მაღალ დონეზე“,-აღნიშნა ლესჩინსკაიამ.
ბოლო ათი წელი ისეთი ტენდენცია გაჩნდა, რომ საქართველოს მოქალაქეები ინგლისურ ენას უკეთესად ფლობენ, ვიდრე რუსულს. კადრების სპეციალისტებს კარგი ინგლისურის მცოდნე პროფესიონალების პოვნა უფრო ეადვილებათ, ვიდრე კარგი რუსულის, ხაზი გაუსვა ლესჩინსკაიამ.
„იმ ფაქტს თუ გავითვალისწინებთ, რომ საქართველოს შრომის ბაზარზე იზრდება მოსკოვის წარმომადგენლობებისა და ბალტიისპირეთის კომპანიების რაოდენობა, თუ გსურს მოეწყო საერთაშორისო კომპანიაში, სასურველია რუსული ენა იცოდე“,-აღნიშნა მან.
გასულ წელს საქართველოს განათლებისა და მეცნიერების სამინისტროს გადაწყვეტილებით რუსული ენის შესწავლა მეხუთე კლასიდან დაიწყო, და არა მეშვიდედან, როგორც ადრე.
ქართულ სკოლებში რუსული როგორც მეორე უცხო ენა კვირაში ორჯერ ისწავლება, რაც სპეციალისტთა აზრით, ენის სრულყოფილი შესწავლისთვის საკმარისი არაა.
