თბილისი, 31 მაისი — Sputnik. საქართველოს პრეზიდენტმა გიორგი მარგველაშვილმა ვეტო დაადო „საკონსტიტუციო სასამართლოს შესახებ კანონში“ შესატან ცვლილებებს, რომელთა თანახმადაც პრეზიდენტი და პარლამენტის თავმჯდომარე უზენაესი სასამართლოს თავმჯდომარის არჩევის უფლებას კარგავენ.
„პარლამენტს გადაეგზავნება ის მოტივირებული შენიშვნები, რომლებიც აქამდეც გამოსახავდა ჩვენს კითხვის ნიშნებს… ჩვენი თანამშრომლობის შედეგად, ბატონ პრემიერ–მინისტრთან, მე მაქვს იმედი, რომ ჩვენი პოზიციები იქნება გაზიარებული და პარლამენტი ვეტოს გაიზიარებს და საქართველოს საკონსტიტუციო სასამართლო გააგრძელებს ეფექტურ ფუნქციონირებას, რაც ძალიან მნიშვნელოვანია ჩვენი სახელმწიფოსთვის“, — განაცხადა გიორგი მარგველაშვილმა ბრიფინგზე.
შეგახსენებთ: ვენეციის კომისიამ, რომელმაც შეისწავლა პარლამენტის მიერ მაისის შუა რიცხვებში მიღებული ცვლილებები, კრიტიკული დასკვნა დადო, რომელიც 30 მაისს გადმოუგზავნა პრეზიდენტის ადმინისტრაციას. ოპოზიციურმა პარტიებმა კომისიის დასკვნას მკვეთრად უარყოფითი უწოდეს და პრეზიდენტს კანონზე ვეტოს დადებისკენ მოუწოდეს.
