თბილისი, 28 მაისი — Sputnik. ჰონკონგში ღვინისა და ალკოჰოლური სასმელების საერთაშორისო გამოფენა VinExpo 2016 ჩატარდა, რომელშიც 12 ქართული ღვინის კომპანია მონაწილეობდა.
გამოფენის გახსნის დღეს „მეღვინეობა ხარებას“, როგორც ბორდოს ერთ–ერთი ყველაზე პრესტიჟული საერთაშორისო კონკურსის Les Citadelles Du Vin 2016–ის გამარჯვებულს, ჯილდოები გადაეცა.
კერძოდ, ნახევრად ტკბილი „ქინძმარაული 2014“ ოქროს მედალთანე რტად სპეციალური პრიზით, ოქროს ტასიტაც დაჯილდოვდა. ოქროს მედალი ასევე აიღო მშრალმა თეთერმა ღვინომ „მწვანე 2015“.
გამოფენაზე სტუმრებს შესაძლებლობა ჰქონდათ დაეგემოვნებინათ ღვინოები, რომლებიც წარმოადგინეს კომპანიებმა: „ღვინის კომპანია დუგლაძემ“, „შალვინომ“,GWS–მა, „თბილღვინომ“, „ბესინიმ“, „შატო მუხრანმა“, „წერეთლის მარანმა“, „კორპორაცია ქინძმარაულმა“, G Vino–მ, KTW–მ, „მარნისკარმა“, „კახეთის ღვინის მარანმა“ და „მეღვინეობა ხარებამ“.
ღვინის ეროვნული სააგენტოს წარმომადგენლებმა, რომლის მხარდაჭერითაც წარსდგნენ ქართული ღვინის კომპანიები გამოფენაზე, შეხვედრები გამართეს ღვინის იმპორტიორებთან და კონსულტანტებთან, რა დროსაც მომავალი თანამშრომლობის საკითხები განიხილეს.
გამოფენა VinExpo ღვინის ინდუსტრიაში წლის უმნიშვნელოვანესი მოვლენა და მსოფლიო კლასის გამოფენაა, სადაც ათობით ათასი პროფესიონალი, იმპორტიორი, დისტრიბუტორი, ბლოგერი, მწერალი, ჟურნალისტი და ღვინის მოყვარული იკრიბება მთელი მსოფლიოდან.
